E leai se aulotu o le pulega a Faleata a le Ekalesia Faapotopotoga Kerisiano Samoa na faalogoina se leo faatautee pe faaali se le fiafia ina ua taupule le faamoemoe o le faamati a le pulega i le tausaga ua mavae mo le tausaga nei 2010.
O le faaaliga lea a le tiakono toeaina o le pulega le tofa i le igoa matua, Ulu Vaomalo Ulu Kini, o se tasi sa avea ma faipule o Faleata i Sisifo ma sa seei foi i le Kapeneta i le tofi minisita i se tasi o paeaiga ua tuanai a le Palemene.
O le faaiuga a le pulega ia faatau ni taavale foeuli taumatau mo faafeagaiga e avea ma faamati o le tausaga nei, ia ogatasi lea ma le faamoemoe o le Malo e sui le itu auala e feoai ai taavale i lo tatou atunuu.
Na faaalia e le tiakono toeaina i sona finagalo na tuuina atu i nisi o auala o faasalalauga, o se finagalo na a‘e e lagolagoina ai le fuafuaga a le Malo ina ua pasia e le palemene e pei ona amata ai le suiga o le itu auala i le aso 7 o Setema o le tausaga na tea nei 2009.
E $1.4 miliona se vaegatupe na aao mafola i ai aulotu e 16 ua faatau ai taavale foeuli taumatau mo a latou faifeau ma o ni taavale sa faaaoga muamua poo used car sa faatau mai i fale taavale poo car dealer eseese ua iai nei i Samoa e aofia ai le kamupani taavale o le Asco Motors.
O le Aso Faraile 26 o Mati 2010 na faalauiloa ai nei taavale i se sauniga o le faamati a le pulega sa aofai uma ai i le malumalu o le ekalesia EFKS i Vaigaga.
O se matatia ua faatu e le Pulega a Faleata mo faamati a le ekalesia o lenei tausaga, aua o se taimi muamua lea ua aapa ai se pulega e faatupe ni taavale fou mo faifeau, ae ua le o saoga masani o faamati e pei o fala, ipu, na isi lava tapenaga mo le faaoloaina o le faifeau ma lona faletua ma lo la aiga.
Faaalia e le tiakono toeaina, o se faamati tāua tele i tagata lotu o le pulega aua o se faiga taulaga sili lea mo auauna a le Atua o loo feagai ma le tausiga o lafu mamoe poo aulotu.
O loo iai nisi o finagalo o loo faasala ese ai i le faamati lenei, ae o loo mumusu ia tagata e faailoa o latou suafa.
O le latou mau o se faamati ua le alofa i le lima vaivai ma le oi o nisi tagata ma aiga lotu e tau faasoasoa tupe ona e maualalo le tupe maua.
E manatu foi ia tagata o se faamati ua fai ai viiga o i latou na tapenaina, ae ua leai se viiga mo le Atua ona sa fai ma le oi.
O loo matua tetee lava iai nisi o le pulega i ia manatu i le latou mau, e mafua ona faapea lagona o nisi ona o le lē fia tautua lotu.
O se faamasinoga e faia e le tagata lava ia nei fuafuaga aua o loo manatu foi nisi, e ao i taitai o ekalesia ona tausolomua ona fai se faamama avega mo mamoe ma faaolaina ai agaga, ae le o le faamamafa o le avega ua solomuli ai nisi tagata ma iu ai ina liu lotu.
