O Saina o se malo ua mautinoa le malosi o lona tamaoaiga ma ua tufa atu foi lona malosi lea e fesoasoani ai i atunuu eseese o le lalolagi e ala i le atinae o le tamaoaiga i soo se itu.
I Samoa o le mafutaga vavalalata a malo e lua o loo mafanafana ma mauaa e pei ona ofo mai lea Malo na te faatupe aoaoga mo nisi o fanau a lo tatou atunuu.
E toa 16 tama ma teine mai Samoa ua sauni e malaga mo Saina i le amataga o le vaiaso fou mo aoaoga faasikolasipi, o i latou ia e aofia ai: Vaeluaga Reti, Tusipepa Mary Malaga, Fau Lene, Visesio Molioo, Jade Natalya Rasmussen, Beauman Fuimaono-Reti, Telesia Tofilau, Shaarnalei Ward, Lisi Gisa, Philatelic Taavili, Taofia Junior Tuimauga, Asofitu Lafaitele (Bachelor in Architecture), Lita Iosefa, Junior Leafa, Joseph Hunt, Michilene Time.
O i latou uma nei o le a aooga mo le sailiga o faailoga i mataupu tau aoaoga, o fesootaiga faatekonolosi, pisinisi, fesootaiga, tusia o ata o fale, inisinia, pulega, o galuega tau televise ma faasalalauga faapea le tomai faatusitala.
O loo iai pea foi isi fanau a Samoa i Saina, o loo aooga ai i lenei lava polokalame o faiga faapaaga a Saina ma Samoa, ma ua faamaonia foi le telē o le aogā o nei fesoasoani a le malo tele o Saina, mo le faalauteleina o tomai eseese o alo o Samoa lea ua amata ona faatino ia latou galuega i Samoa nei ina ua taliu mai nei aoaoga.
