E taugata tele upu ma le gagana faafailauga, atoa ma saunoaga faatamalii a le atunuu. A sua foi le aulapa uta ma le aulapa tai i aso faapea. E lē tuumāmāina i finagalo o tulatoa ma le aufueloloa a Samoa, ona o le faamoemoe i le mauga o le Atua, ma le faila ua tu i lea foi itu o le galuega a le Atua.
O le mafuaga lea o le masii mai o le fala siigata i le alii Palemia o le Malo o Samoa, ma le ekalesia ma ona tulaga faalupeina. O le foai ma le loto malie e sili atu nai lo le faatauanau.
O le afioga ia Leaupepe Kasiano o le tiakono toeaina o le Ekalesia Kotoliko mai Siusega, sa fai ma sui o le aumalaga mai Samoa, e faafetaia ma momoli le agaga faagaeetia, ma talia faatuaeleele ai le seleni ma le foai paia sa tauaao i ai, e le gata i le paia i le afioaga i Niu Sila, a o le mamalu foi o aiga ma uo, ma Samoa potopoto sa auai ane ma lagolago i le faamoemoe e pei ona tuutuu laau mai ai mo se fesoasoani.
O le mae‘a ai o faaaloaloga a le malaga mai Samoa, mo ē sa alolofa ane i le e ala i le tusigaigoa, ona fofoga lea o le aofaiga o le maamaau ma le milomilosia e ala i le faitauga muamua o le tupe na faamaopopoina mo se taimi vave.
E tusa ma le $118,000, ae peitai o le tau faaiuiu o le saunoaga a le afioga ia Leaupepe, sa ia toe kolosia ai se laina itiiti lava e faapea, toe $2,000 lava atoa le $120,000, ae ui i lea, e leai se mea e popole ai, o le a toe foi i Samoa le malaga e saili ai se $2,000 e faaatoa ai le fuainumera sa ia ta‘ua.
Ae ina ua mae‘a le saunoaga a Leaupepe, ona tulai lea o le tofa ia Salapo e fai ma sui o le ekalesia PIPC Avondale, sa agai tonu i ai faaalologa a le malaga sii mai.
Ona o Nafanua Hall sa faataunuuina ai le faamoemoe, sa ave ai le faaaloalo i le sui o le ekalesia. Sa taualuga le fetaliga o le aso le tofa ia Salapo, i le toe tuuina ane o le $2,000 e faaatoa ai le $120,000 e pei ona tagi tautala ai Leaupepe i lana saunoaga.
O le uiga lea o le manatu, e taugata tele le gagana faafaleupolu, ma saunoaga faatumua, a tamalii ma failauga o le atunuu.
O le faagasologa o upu a toeaiina e mālie, ae taugata a o se isi foi itu, e faauiga gata ona o le uiga foi o le aso latou ma lona mafuaaga, sa lē tuumāmāina ai e le faafofogaaga a le au fai tofa ma le au faitau laulu a le atunuu.
O le toe tuufaatasia ma le toe faitauina mulimuli o le seleni e le komiti ma le laulau o le faigamalaga, atoa ai ma le toe faaopoopoina o le $2,000 a Avondale, na toe suia ai ma lona aotetelega faaiu i lea afiafi, na tulai mai ai le tinoitupe e $137,231.24 NZ, ma le $3,000 tala Ausetalia.
O le aofaiga lea sa faamauina i lona faitauga mulimuli ina ua mae‘a ona toe siakiina e le komiti faafoe o le malaga, ma o le oso foi lea ua taliu nei ma Siusega i le tusigaigoa sa faataunuuina.
A o iai le polokalame i le vaega mulimuli mo lea afiafi, ae taunuu loa le afioga i le alii Palemia, le afioga ia Tuilaepa Aiono Lupesoliai Sailele Malilegaoi.
O le afioga i le Palemia o le atunuu sa iai i se fonotaga a malo o le lalolagi i Amerika, ona taumafai lea e fia asia le faamoemoe o lana ekalesia o loo tautua ai i le atunuu, lea e fitoitonu i ai lea aso.
O lona taunuu ai i le malae vaalele i Aukilani na tuusa‘o ane lana malaga i le Hall a le ekalesia i Avondale, o le nofoaga sa faataunuu ai le faamoemoe.
O le vaega faaiu o le polokalame o lea afiafi sa toe liliu ai le malaga mai Samoa, e faaauau lana faaaloalo i le mamalu o le komiti i Niu Sila sa faamaopoopoina se vaega, atoa ai ma alo ma fanau a Siusega e ala i ie tetele o le malo.
O le afioga i le Konesula Aoao o le malo i Aukilani, Faolotoi Reupena Pogi ma le susuga i le Papaliitele Peter Taouma, faapea le afioga ia Toolepai Lui Tautolo, Masuisui JR Pereira, ma isi lava tamalii, sa taitaia le faatali a Aukilani auā le masii mai o le faigamalaga.
Sa toe faaaloalo foi le mafutaga i Aukilani e pei o faiga masani e avatu lo ae aumai foi ni lo, e ala i le sua a le ekalesia mai Samoa.
O le afioga i le alii Palemia, sa fai ma sui o le ekalesia mai Samoa, e molimoli le agaga faafetai i le komiti i Niu Sila, ona o le onosai ma le tapenaina mo le taunuu mai o le malaga. O le saunoaga foi a le Palemia, sa ia ta‘ua ai e faapea, o Oketopa o le tausaga nei lava o loo fuafua e tatau ona faamae‘a ai le galuega ma faapaiaina ai.
O le taeao o le Aso Sa, na sososo ai ma le Aso Toonai sa faataunuu ai le faamoemoe, na toe taliu uma ai le faigamalaga i Samoa, ona o le naunau lava e faagasolo pea le galuega ina ia aua ne‘i motusia.
Ae lē gata foi i lea, o le toatele lava o le mamalu o le ekalesia o tagata faipisinisi uma, ma o le ala foi lea o le lē umi o se taimi e nonofo ai, ona o galuega o loo faatali mai.
Talaotooto o le galuega ma le mauga o le Atua i Samoa
O se feiloaiga a le Samoa Times ma sui o le laulau o le malaga mai Samoa, sa fesiligia ai, pe fia le tauaofai o le galuega o loo feagai ai. O le tali mai a sui o le ekalesia, e tusa ma le $5 miliona lona tau aofai.
O le seleni na tauaaoina i lea afiafi ua iai le manatu o le komiti o le a faaalu se vaega o le tupe lea, e faamae‘a ai ivivi o le fale o loo faatali ai nei, atoa ai ma se vaega ititi o loo totoe, ona atoa loa lea o tino o le tama e tusa ai ma le faamoemoe o le faafeagaiga ma le mamalu o le ekalesia i ona matafale galulue o loo iai.
E tusa ai ma se faamatalaga, e faapea e fai lava si telē o le galuega poo le mauga o le Atua o loo atinae nei i totonu o le afioaga, ma le faamoemoe e lē mo na o le afioaga, peitai o le a mafai foi ona fesoasoani mo nisi o fonotaga tetele a le ekalesia aoao e faia atu i le atunuu.
O le ata o le malumalu e pei ona ta‘ua e le afioga i le agai-o-tupu o loo tu i matagiolo mo le fausiaina o le galuega, le tofa ia Tialavea John Hunt, na ia ta‘ua ai e tolu matafale o loo faatulaga i le faatusa o le satauro sona ata o loo fausia agai i ai, ma e tofu foi na matafale ma fata faitaulaga i totonu o lava o le malumalu.
O le fausaga faapei o fale tetele i Roma, o se ata lea o loo mulimulitai i ai le fauina o le malumalu lenei.
O ona faamalama e tusia ai ona teuteu ma ata masani e fai lava foi sina taugata. E tusa ma le $2,500 NZ, le tau o le faamalama e tasi, ma o Niu Sila foi o loo gaosi atu ai mamanu ma teuteu o faamalama e pei ona saunoa i ai Tialavea.
O se tasi o tamalii o le atunuu sa galue ma auauna i Niu Sila nei i le tele o tausaga ua tuanai, le tofa ia Mataafa o ia lea o loo nafa ma le galuega tau eletise mo le fale atoa. O le tufuga ma le faieletise o sui uma o le ekalesia i Siusega.
O le faatupeina o le galuega e oo mai i le taimi nei, oloo tagi lava i lima i totonu lava o matafale galulue, se‘i vaganā ai le sailiga seleni lea na afea ai Aukilani i le faaiuga o le vaiaso.
