Ua faailoa nei e le Minisita o le Matagaluega o Leoleo ma Falepuipui faapea le Pulega o le Fuimu ma galuega laveai i faalavelave faafuasei le afioga Sala Fata Pinati, le faamalolo lē tumau o le tofi minisita lagolago o se tasi o faipule o le Palemene o loo i lana matagaluega, le tofa Lafaitele Patrick Leiataualesa.
Ina ua fesootai atu i le minisita i lona ofisa i le telefoni mo se faamatalaga tonu o le mataupu na ia faailoa mai ai, e 12 masina o loo faia ai lea faasalaga, ae ei le Palemia le faitalia i soo se taimi lava e mafai ona toe filifilia ai le faipule o Alataua i Sisifo i lona tofiga minisita lagolago.
“Ia o tala lava na sa fai i le fono a le faafaletui, ae o le 12 masina e pei se probation period, e pule ai lava le Palemia pe lua pe tolu masina ona toe foi mai lea o le sui pe a uma ona toe iloilo e le faafaletui”, o lana saunoaga mai lea.
Faaalia e le Minisita o se latou inuga ‘ava faasamasamanoa na alia‘e ai se amioga lē talafeagai a le faipule lea ua mafua ai le faaiuga.
E lei mafai ona faamaonia mai e le minisita ni molimau e faapea sa lafo ai i le inuga ‘ava Samoa lea ni upu malolosi e Lafaitele faasaga i le isi minisita lagolago sa auai.
“E lē mafai ona fai atu poo ā tonu upu na saunoa i ai le faipule auā na ou tei i le logo mai o le mea na tupu ae ou te lei iai i le taimi lea.”
Ua lua nei paeaiga a le Palemene o avea pea Lafaitele ma faipule o lona itumalo, ma o se tasi lea o faipule pito finau mo galuega e faaleleia ai lona itumalo aemaise lava o le atinae o le suavai taumafa lea ua tino mai. O se tasi lea o galuega ua na ausia ua matuā faafiafaiina ai lona itumalo.
O Lafaitele o le isi lea faipule o le Palemene sa galulue faatasi ma le faipule o Sagaga le Falefa i le matagaluega o leoleo ma le fuimu ina ua filifilia minisita lagolago.
Peitai o loo tumau ai pea i ia matagaluega seia oo ina faamalolo lē tumau lona tofi, ae ua ese le isi matagaluega ua see i ai le faipule o Sagaga le Falefa, ae ua sui atu i le faipule o Vaa Fonoti le afioga Tialavea Seigafolava, lea ua toe toatasi nei o ia i le matagaluega o leoleo ma falepuipui ma le tineimu.
