Mafutaga Falelima i Aukilani ma sui o le aumalaga mai Samoa

Mafutaga Falelima i Aukilani ma sui o le aumalaga mai Samoa

O lagona ma manatu o le mafutaga a Falelima i Aukilani, e leai so latou manatu latou te taulimaina se tupe tele faapenei mo le fausia o le maota o le faafeagaiga i Falelima i Samoa. Peitai o le valevale alofa ma le limalima faatasi ma le loto ua tumua i le fiafia ua afua ai ia lagona o le fia foai mo le galuega a le Atua. Ae o le matafaioi foi lea a le Isaraelu moni poo fea lava e aumau ai e susue lava lona faamalama ma toe vaavaai i lona faasinomaga ma lona tupuaga, na fofoa ma faafailele ai lona soifua. Aea upu a le atunuu e lele lava i fea le toloa ae maau lava i le vai.

Ina ua maea le faamoemoe o le po siva a Falelima i le aso Toonai na toe alalaga ai le mafutaga a Falelima i Aukilani nei faatasi ai ma le aulamaga mai i Samoa ma faapea ane i le Atua, ia aua lava nei ia te i matou lou viiga ae ia toe faafoi atu ia toe le Atua le viiga ma le mamalu ona o mea ua e faia ma foai i lima o le mafutaga e tali ai le manaoga o le ekalesia i Samoa e ala lea i le toe fausia o le maota o le susuga i le faafeagaiga.

Ua atoatoa lagona o le fiafia o le susuga i le faafeagaiga mai Samoa ia Rev Faapea Elia faapea ma nisi o sui o le ekalesia Metotisi mai Falelima na malaga mai e galulue faatasi ma le mafutaga a Falelima i Aukilani aua se sailiga tupe e fausia ai le maota o le galuega, ina ua latou taulimaina se tupe tele mo lea faamoemoe.

Nisi o tuaa sinasina o loo latou faamaopopoina le mafutaga faatasi ai ma susuga i faafeagaiga

Nisi o tuaa sinasina o loo latou faamaopopoina le mafutaga faatasi ai ma susuga i faafeagaiga

E ui i le le faigofie o nei aso ma le taugata o le soifuaga, ae ua le faalogologo tiga ai le mafutaga i le fia fai mea lelei mo le Atua ma lona finagalo e ala lea i le faamaopopoina o lenei faamoemoe e pei ona faatinoina i le aso Toonai ua mavae i le hall a le ekalesia Metotiisi i Magele.

O le faamoemoe ua taunuu o le laau lea o le soifua, aua o le faamoemoe sa taumate i lagona ma finagalo o le mafutaga se aofaiga o se tupe e maua, aepeitai ane o lea ua faailoa le lelei o le Atua i le tagata tautua lotu ma tautua aiga lea ua foai ai lenei tupe tele aua le galuega a le Atua.

O le mafutaga o loo taulamua ai nisi o tama ma tina matutua o le afioaga o Falelima o loo aumau i Aukilani, faatasi ai ma le lagolagosua a ana lupe faalele o loo manavaina le upu o le ola i totonu o fata faitaulaga.

O le faamoemoe na tatalaina i le sausaunoaga a le afioga i le alii sea o le sinoti i Saute ia Rev Oianatai ma le matagaluega mai Manukau, ona faasolo loa lea o ipu a matagaluega taitasi a le Metotisi i Aukilani lea sa fesoasoani atu, faatasi ai ma ipu a nisi o uo ma e masani sa tauala atu i nisi o aiga o le mafutaga a Falelima.

Na faasolo ipu mo aiga o Falelima e leo iai i totonu o le mafutaga ae sa tuu atu lava o latou tauau e galulue faatasi ai ma matafale o loo i totonu o le mafutaga, ona faamulimuli loa lea i ipu a aiga e 24 o loo faatinoina le mafutaga, ma taualuga ai loa i le sausaunoaga a le susuga i le faafeagaiga ia Rev Logopati Mataafa ma le faletua ia Lealofisa Mataafa.

E $3,000.00 le ipu faavae na faatuina mo le matafale, ae sa toatele lava i latou sa ausia le tusaga ma iai le faasiliga, ae itiiti lava i latou e lei ausia, ae o le susuga i le faafeagaiga ia Rev Logopati ma lona faletua e $7,000 le sausaunoaga na taualuga ai le faamoemoe i lea aso. O le tofa ia Fagamalo sa fai ma fofoga o le aso ao le taitaifono o le mafutaga a Falelima i Aukilani le tofa ia Taituave Amosa na gafa ma faaaloaloga.

Na saunoa le susuga i le tausi matagaluega mai Samoa ia Rev Faapea Elia e fai ma sui o le ekalesia i Falelima i Samoa e momoli le loto faafetai ma le faamalo i le paia ma le mamalu o le auvalaaulia sa auai aemaise o susuga i faafeagaiga ma o latou faletua faapea ma matagaluega taitasi sa laolagosua i lenei faamoemoe, aemaise ai o tama fanau o Falelima o loo fausia ma faamaopopoina le mafutaga a Falelima i Aukilani i le latou loto tautua nuu, tautua lotu tautua aiga lea ua faamalieina ai le savali na tauasa mamao mai ai sui o le ekalesia mai Samoa aua le toe faaleleia o le maota o le galuega.

Faapitoa foi le faafetai a le susuga i le faafeagaiga i lupe faalele uma o Falelima o loo i totonu o Aukilani o lea sa fesoasoani i lenei faamoemoe, ma le tatalo ia toe faatutumu e le Atua mea sa faagaogaoina ona o lana feau ma lana galuega.

E ui i le eseese o tovine o loo galulue ma tautua ai le Atua ma lona finagalo ae ua galulue faatasi lava tama fanau o le nuu i Aukilani ona o le manatu i le Atua ma lana galuega aemaise ai e le mafai ona ave esea i o latou loto le nuu e pele i le fatu ma le agaga.

O le seleni sa mauaina o lea ua tuuina atu nei i le tusi tupe a le mafutaga a Falelima i Aukilani ma le faamoemoe o le mafutaga ma le susuga i le faafeagaiga ma le aumalaga mai Samoa o lea amata loa ona faagaioi le galuega o le maota o le faifeau.