E viia ai le Atua, ona o le masina lenei ua atoa lelei i ai le 10 tausaga talu ona faavae mai ma atinae le tautua a le Enchiro Laei, containers ma le lolomiina o togiga ma laei.
I se saunoaga a le afioga i le aloalii ia Galumalemana, Tagaloa Naea Timoteo o le alii pule, sa lei faigofie le amataina auā sa fafauina ma faafailele mai i se nofoaga pumoomoo ae sa iai lava le aao laveai o le Atua a o faapea foi ona soifua mai le tina o tamaiti, le faletua ia Vaasā Fonoti Timoteo mai Laulii.
O le faleoloa o Laei ma soo se vaega na amataina mai i le 2004, a o Oketopa i le 2003 na amata tatala ai le kamupani e lafo ai containers mo Samoa ma le Pasefika faapea le Screen Printing.
E ui lava ina momotu le mafutaga i le maliu ma le oti peitai e fai a si faigata o le nofo toatasi ma le mamafa tele o galuega aemaise le pisi tele, o lea sa moomia ai lava e le toeaina se fesoasoani e pei ona ta‘ua i le Tusi Paia, na faia e le Atua le tamaloa ae tatau ona iai sona fesoasoani e lē gata e vaavaalua ae mafai foi ona talatalanoa i ai ma fautua i le faigata o tulaga tau faagaioiga o pisinisi e pei ona silafia lea na toe filifilia ai e le afioga i le aloalii ia Galumalemana Naea Tagaloa Harry Timoteo (Malie ma Eva Salelesi) le faletua ia Apu Wendy mai Lotofagā.
E maoae foi le matagofie o lea tautua e ala i laei felanulanuai ma DVDs, CDs lafo ai foi tupe i Samoa, fai ai faatau a Aliki ae piki i Samoa, ae pei o le container lava o loo vaavaalua ma le PFL o le lima taumatau e fesoasoani malosi i le mamalu o le atunuu mo pusa ma faamomoli mo Samoa ma le Pasefika.
E ma‘oti lava le faleoloa ma le container e faauluulu i le afioga i le aloalii ma le faletua, ae o le screen printing o loo puleaina e lona alo tamaitai ia Diane ma si ona alii ia Mika Nansen.
Sa faamanatuina le 10 tausaga i le Aso Lulu, aso 23 o Oketopa ma faapa‘ū uma ai le tele o oloa i le vaiaso atoa aemaise le art work ma le set up sa faia fua, piki fuaina mai pusa e lafo atu i Samoa.
O le Enchiro Laei, Containers ma le Screen Printing o loo faatupeina le leitio a le Penina o Asuisui i masina uma faapea le lagolago malosi i le polokalame o le Paneta o le Ola i laugatogi i faaiuga o tausaga uma e ala i pepa malaga fua ma nisi meaalofa mo le au tali fesili aemaise o mitiafu foai fua mai le Screen Printing.
Mo tauaiga e fia moomia le afioga i le aloalii, e te maua i le numera 0488005634 poo le faleoloa i le tuatusi:
10B/390 Kingston Road Slacks Creek
poo le telefoni: 07-3290 4724.
