“Ua ia te i tatou le Alii o ‘au”.
O le finagalo autu lea o le aso soifua faamanatu o le Ekalesia, e pei ona sa faataunuuina i le Aso Sa na tuanai atu, aso 17 0 Iuni, sa tusia afioga ia a le faisalamo i le tagavai na agiagia i luga a‘e o le stage, ae na fai foi ma autu o le upu folafola o le aso, lea sa fofogaina e le susuga i le taitai aoao o le Ekalesia i Niu Sila ma Ausetalia, le susuga i le faafeagaiga ia Uilisone Taito, oloo tausinuu i Aukilani.
O le Ekalesia i Melepone oloo tausia e le susuga i le toeaina, le faafeagaiga ia Aliiaunoa Fagaloa Fuimaono ma le faletua ia Atonauna Fuimaono.
O le taimi nei ua iai se tasi lala o le Ekalesia ua faatuina i le pitonuu o Pascoe Vale, oloo taitaia e le susuga i le faafeagaiga ia Lui Su‘a, ae oloo sauna atu foi e faatuina se tasi lala i le itu i Sasa‘e o Melepone, i le pitonuu o Hoppers Crossing.
O le faamoemoe ua taunuu o le laau o le soifua lea, auā o le aso ua ula, ma ua maualuga, ona o le mamalu o le aufaigaluega tofia le Atua mai fata faitaulaga eseese na susū atu e lagolagoina ma patipatia le aso tele o le Ekalesia, aemaise foi o le mamalu o le valaaulia, ma Ekalesia e fia na faafiafia a latou autalavou na matagofie atili ai le sauniga.
Na mae‘a le sauniga lotu, sosoo ai ma faafiafiaga mai Autalavou eseese, ona alo ai lea i le taumafataga tele lava na maau i ai le Ekalesia, feula ai lea o le keke o le aso fanau e le taitai mai Niu Sila, ona alo ai foi lea o le Ekalesia mo faaaloaloga masani mo le aufaigaluega paia, aemaise foi o le faleupolu o tofiga ma la latou pitolaau tauave.
O le molimau ma le talaaga o le sefulu tausaga o le Ekalesia na fofogaina e le faafeagaiga ia Aliiaunoa, a o le aaotusitusi lava o le Ekalesia na fai ma fofoga o le aso, le tofa ia Taumalae Otineru.
Na maualuga le viiga o le Atua silisiliese ona o le faatasi mai o lona Agaga Paia, aemaise o lana tausiga alofa i soifua o Samoa uma na potopoto.
Ona faaiuina ai lea o le aso matagofie ma le tāua i le pese masani “Lota Nuu” auā Ua ia te i tatou le Alii o ‘au.
