2. E Tāua foi le Saili o se Loia e Gafatia le Mataupu o Feagai ma oe i le Amataga, ia Silafia, e Eseese Matata o le Tulafono e Galulue ai Loia:
Ona o le tele o taimi ma tupe e alu i le taumafaiga e faasa‘osa‘o ni faaupuga o ni uluai tusitusiga, i se mataupu e tulai mai, ou te fautuaina lava le saili o le fesoasoani i le taimi muamua lava a o lei fai ni tusitusiga i se mataupu o fai ai ni finauga.
O le vaiaso nei sa ou galue e fesuiai ni pepa mo se mataupu o loo o‘u tu ai i le High Court i Aukilani. Ona o le tele o taimi sa alu ona o le faaaogā sese o upu, i tusitusiga muamua, o le ala lenei ua laga ai se manatu e tusia lenei fautuaga.
E laititi mamao le taimi ma tupe e alu, e amata sa‘o ai se mataupu mai i le amataga. A sa‘o ma lelei faaupuga mai i le amataga, e faigofie ona tapena pepa e ave i le fale faamasino pe a oo se mataupu i luma o faamasinoga; e iai foi le avanoa lelei e finauina ai e se loia lelei se mataupu i le fale faamasino.
O le loia lelei ma ua lava le tomai i le galuega loia, e lava lona iloa ma le taleni i le faaaogā sa‘o o upu e tatau ona faaaogā, ma fuafua upu e faaaogā, ma uiga o upu e faaaogā.
E sili lava ona saili se fautuaga i le taimi muamua mai i se loia e malamalama i le gagana Samoa ma mafai ona fautuaina oe i le tulafono, ae lei aveina ni tusitusiga i se isi, tagata poo se faalapotopotoga, poo se vaega o le malo, poo se kamupani, poo se aulotu. E moni e totogi galuega a loia, ae laititi le tupe e alu i mea e lelei ma sa‘osa‘o le faiga mai i le amataga.
O le tele o tusitusiga e faaaogā upu e lē tatau ona faaaogā. O le ala lea e tatau ai ona ta‘u i se loia le mataupu ma upu o e fia faaaogāina i se tusi i le isi itu, ona fautua atu lea e le loia upu e tatau ona tusi, e puipuia i lau aiā tatau i luga o le tulafono, e faia i le tusi lea e fia fai, ae o lena tusi e tatau ona tusia i upu e feagai ma le tulafono e aua ne‘i e faaaogāina upu e lē fetaui ma e solia ai aiā tatau a le tagata o loo e tusi i ai.
E Sili le Puipuia i lo le Togafitia:
Pagā le faigata o le vaaia pea i mataupu e lavelavea ai tatou tagata i le tulafono, ona o le lē fautuaina i le amataga. E sili mamao ia te au le avatu o le fautuaga i le amataga ona e silafia lea o le mea e tatau ona fai, ma upu e tatau ona faaaogā, pe a e faaaogāina le fautuaga.
Afai ai e oo le mataupu lea i se fale faamasino, e faigofie ona fai e le loia auala e fesoasoani ai mo oe, ma taugofie foi pe ana sa‘o le faiga mai i le amataga.
O le tele o tatou tagata e fai lava e latou mea i le amataga ona faato‘ā o ai lea i loia i le taimi ua vevesi ai ma oo le mataupu i le fale faamasino. Pe aisea?
O le isi mea, a faatamala, e tele ai galuega fai pe a faato‘ā o i loia, i le taimi ua vevesi ai, ae tele ina lē gafatia e tatou tagata tau o galuega faaloia, e tatau ona tapena ia tele ai se avanoa e malo ai lau mataupu i luma o le fale faamasino.
Manatua a faatali se‘i vevesi ma oo i luma o le fale faamasino se mataupu, e lē gata i le tele o le taimi ma tupe e alu, ae o le vevesi ai o va o tagata i totonu o aiga, aulotu faapea ma le tele o le afaina o tagata i luga o le tulafono.
Ua ou vaaia foi i le vaiaso nei, ma le loto faanoanoa le afaina o se tasi alo o Samoa o i totonu o le falepuipui. I lo‘u iloa faaloia, ana lelei le faiga o le faamasinoga ma suesue i le amataga o le mataupu na molia ai lenei alo o Samoa, atonu e lē oo i le falepuipui.
O mea laiti e pei o faaliliuga o upu a leoleo mai i le English i le faasamoa ma tali a lea tama i fesili a leoleo na faaliliu, o loo iai i ni pepa na ou mauaina lata mai nei, ni vaega ou te talitonu sa tatau ona lē faaaogāina i le faamasinoga o lea tama.
O le isi tulaga o loo iai lenei alo o Samoa ona o le lē fea ma sa‘o mea o oo i ai i totonu o le falepuipui, ae pagā lea, e lē o maopoopo se tapenaga o se fesoasoani mo ia i le taiminei. O le uiga o le tala lenei, e lē tatau i lo‘u iloa ona i totonu pea o le falepuipu i lenei tama.
E tele tulafono e lē o faaaogāina e tatau ona faaogā e tatala mai ai i tua lenei alo o Samoa. I lo‘u talitonuga, na sese mai i le amataga gaoioiga sa fai, a o lenei ua loka ai lenei tama, ae faailoga fesili i lo‘u mafaufau, pe sa‘o le ave o lea tama i le falepuipui?
E lē o a‘u le loia na faia le faamasinoga, ae faatoā aumai lata mai nei faila ia te au, ou iloa ai mea e sese ma le lē fetaui i le tulafono. O nei mea e tatau ona faasa‘osa‘o, auā e lē tatau ona falepuipui sese se isi. Ae o le fesili, ae pe gafatia galuega faaloia e tatau ona fai – e faailoga fesili lea itu.
Tautuana e sili le puipuia i lo le togafitia.
