O faalapotopotoga e lua a le Malo le SIFA (Samoa International Finance Authority) ma le TAB (Totalisator Agency Board) ua latou foai ni vaega tupe e fesoasoani ai i le faatupega o le malaga taamilo a le Manu Samoa i Europa lea e amata i le taaloga ma Kanata i le Aso Faraile o le vaiaso nei. O le kamupani telefoni feaveai o le Digicel ua latou faia foi se foai tupe ua maua ai le $900 afe i Samoa faaopoopo loa i ai ma le fesoasoani a le pulega o le lakapi a le lalolagi le IRB e $300 afe ona maua lea o le aofaiga e tasi le miliona lua selau afe tala ($1.2miliona).
O le vaevaega o foai i Samoa o le SIFA e $400 afe, TAB e $200 afe ma le Digicel e $300 afe. Ua ave ai le faafetai a le taitaifono o le iuni lakapi a Samoa le afioga i le Palemia susuga Tuilaepa L Sailele Malielegaoi, i faalapotopotoga e lua a le Malo faapea le kamupani tuma‘oti o le Digicel auā ana leai lo latou aao mafola e lē maua se vaegatupe tele e faatupe ai le faamoemoe o le malaga a le Manu Samoa. E ui ina faafiafiaina le taitaifono ma le Iuni lakapi a le atunuu i le agalelei o ia faalapotopotoga ma se kamupani tuma‘oti, ae e lē o to‘a lelei le moa o le faiaoga ulu ma faiaoga lagolago ona ua fetaia‘i ma ni faaletonu a o lumanai taaloga faitaulia e tolu o le malaga taamilo i Europa. E toafā tama ua lē mafai ona taaalo ona o manu‘aga e tatau ai ona umi se taimi o malolo se‘i manuia ona faato‘ā mafai lea ona taaalo.
E tusia lenei lipoti e lei faia taaloga i le faaiuga o le vaiaso ua mavae atu nei, sa taaalo ai nisi o tama filifilia ia latou kalapu i Peletania ma Falani, pe lei manunu‘a ai. O popolega ia o le faiaoga ulu ma le pulega o le Manu Samoa ae peitai e lē o solomuli ai tapenaga mo le faagatama o le a alo i ai.
O suiga la ua faailoa mai, o Kane Thompson o le a sui tulaga ai Alafoti Faosiliva, o James Sooialo o le a sui tulaga ia Alesana Tuilagi, o Johnny Leota o le a sui tulaga ia Paul Williams i le taaloga e tasi, le taaloga muamua lea ma Kanata, ae avanoa Paul i isi taaloga e lua i le va o le Manu Samoa ma Farani faapea ma Wales.
O Logovii Mulipola ua lē avanoa foi ona o manu‘aga ma e tusia foi lenei lipoti o loo tau saili se tasi e suitulaga ai e pei ona faailoa mai e le sui mo faasalalauga a le iuni lakapi a le atunuu, le faletua o Rulla Su‘a Vaai.
O le alii taalo o Seilala Maposua ua lē mafai ona auai ona o aafiaga faaleaiga ma ua suitulaga atu i ai George Pisi.
O le mae‘a o le mafutaga faatasi a le au atoa i aso e tolu mai le Aso Lua, Aso Lulu ma le Aso Tofi na tea nei, na toe tatala ai tama lakapi o loo konekarate i Peletania ma Farani mo taaloga i le faaiuga o le vaiaso na tea nei a ia kalapu, ona malaga ane ai lea i le amataga o le vaiaso nei e sauni i taaloga a le Manu Samoa e pei ona tuua ai le atunuu. O le itu mautinoa o le a tapuaia le alo faiva o ana tama fanau e amata atu i le taaloga ma Kanata i le aso 9 o le masina nei, le Aso Faraile o lenei vaiaso, sosoo ai ma le taaloga ma Wales i le aso 16, ae taualuga i le taaloga ma Farani i le aso 24 o Novema.
