“Tutuli tamaiti a‘oga faatupu vevesi”…Palemia

Ua ave le faamanatu a le taitai o le Malo i ulu aoga o Kolisi maualuluga na aafia nisi o a latou tamaiti aoga i se vevesi na tupu i le mae‘a o taaloga afeleti a kolisi ma aoga maualuluga i le vaiaso muamua o Aukuso, ina ia faia le faaiuga talafeagai o le faamalolo o tamaiti na aafia i le faatupuina o lea vevesi.

O nisi o ia fanau aoga sa maua e leoleo e onanā (aafia i le inumia o le avamalosi) ma o i latou ia na taulamua i le vevesi.

Faaalia e le Komesina lagolago o le Matagaluega o Leoleo ma Falepuipui le afioga Leaupepe Fatu Pula, o loo faia pea suesuega i le mafuaaga tonu o le vevesi ae e toalua ni tama aoga ua molia i le onanā i nofoaga faitele.
O le tama aoga o le Iunivesite aoao a Samoa e faapea sa aoga i le Kolisi o Sagato Iosefo, ma se tama aoga o le Kolisi o Avele. E toafā isi tamaiti o loo molia ae lē o mafai ona faailoaina suafa ma aoga o loo a‘oa‘oina ai ona e itiiti tausaga.

O le lua tausaga talu ai sa faia ai le faaiuga a le Kapeneta e taofi le toe faia o taaloga afeleti ona o vevesi foi na aliali mai na aafia ai fanau aoga i nisi o kolisi maualuluga.

Na taofia ai foi ma le toe faia o ni taaloga lakapi a kolisi maualuluga ona o le mafuaaga lava lea. Peitai o lea foi ua toe aliali mai, ma ua manatu ai nisi o mātua, pe lē ua tatau loa ona tuu ma faamuta loa taaloga afeleti.
O loo mamafa i le Malo aemaise lava i le alii Palemia le tulai mai pea o ia faaletonu ma tauvalea ai le igoa lelei o kolisi ma aoga maualuluga o loo a‘oa‘oina nisi o fanau o loo aafia i le faia o vevesi.

O le mafuaaga foi lea o le faamanatu a le alii Palemia i faauluuluga o aoga e aafia fanau i ni gaioiga faatupu vevesi ina ia faia le faaiuga sili ona maua ai le a‘oa‘iga lelei, o le tuli ese ma sea kolisi.

O le Kolisi o Sagato Iosefo ma Avele o loo molimauina le aafia pea i nei ituaiga o faafitauli, ma sa faia ai ni leleiga i le va o ia kolisi e lua i tausaga ua tuanai.

Peitai e ui ina faatino lea tulaga i le naunautaiga o Ulu aoga ma faiaoga ia maua le nofo fealofani, ae o loo iai pea lago mate o loo manogi leaga ai le suauu manogi.

Ua faaalia e se molimau faatuatuaina, o tama aoga e toalua ua molia i le tagofia o le avamalosi ua faamuta o la avanoa i aoga sa a‘oa‘oina ai, talu le vevesi na aliali mai.

O mātua o loo mafatia i faaiuga nei, auā e ui e lē o iai so latou silafia o ia amioga a fanau ae ua sili ona mafatia i le faamuta o le ola a‘oa‘oina.