O le finagalo lea o le Palemia, le Susuga Tuilaepa Lupesoliai Sailele Malielegaoi ina ua valaaulia e tatala aloaia le fono ua faatautaia nei i Samoa ma ua talimalo ai le Iunivesite o A‘oa‘oga Faafomai a le Oceania i Samoa le OUM.
O lea saunoaga na ta‘ua ai e le alii Palemia, a lē sa‘o ma manino le faamatalaga o se gasegase, e taumatemate lava foi le tulaga e oo i ai le malamalama o le tagata o loo maua i gasegase o le tino.
“Afai ua maua se alii i kanesa o le itutinosa, ta‘u sa‘o i ai, afai ua lē mafai ona fanau se tamaitai, ta‘u sa‘o i ai faatasi ai ma mafuaaga, ae lē o le taamilo ai lava ae uma ane e lē o manino lava le tagata lea ua gasegase i le tulaga o iai lona soifua maloloina. O le tele o taimi o le tulaga lea o loo vaaia nei i le auauanaga lenei i Samoa.”
O le tele lava o fomai o loo auai i lenei fonotaga o i latou ua faapea ona faia le tautua i totonu lava o Samoa. O nisi o fomai o loo i Niu Sila, Ausetalia ma Amerika ma o i latou uma nei o loo fesootai ma a‘oa‘oga o loo faatautaia i le OUM.
E fai lenei fono tele ae o loo gugulu solo lava foi le atunuu i le faamalolo ai o le Pulega o le Iunivesite ma tagata faigaluega.
O le aofai atoa o i latou ua lē o toe iai ni galuega e to‘a 31. Ua iai talosaga ua iloilo nei e le Matagaluega o Pisinisi, Atina‘e ma Leipa nisi o talosaga ma faaseā ua avatu e nisi o i latou ua tutuli po ua faamalolo ae tuu i ai le tolu masina e tapena ese ai.
O loo i Samoa i le vaiaso lenei le tamaitai o Taffy Gould lea e Taitaifono i le Iunivesite, o se tamaitai milionea mai Amerika sa faia le faaiuga e faatea tagata faigaluega nei.
Na tulituli lava e tusitala mo se tali mai i lea faaiuga ma na ia ta‘ua o le toatele o loo maioio lava le aveese auā o loo faatagaina i lalo o a latou konekarate.
O le tulaga foi lea ua mafai ai ona faia lea faaiuga ona o le manatu se‘i toe faataatia lelei le tulaga e iai le faatinoga o galuega mo le Iunivesite ma o le a mafai ai ona ausia le maualuga ua aloaia ai faavaomalo lenei aoga, o lea ua sui atoa lava ona ofisa.
Na ta‘ua foi e lenei tamaitai o lana faaiuga ua malilie uma i ai sui o le Fono o Faatonu o lenei Aoga e ui o lea e leai ma se tasi o tautala i lenei mataupu. Sa iai foi lafoga na tuu atu e le alii Palemia i lenei mataupu i lana saunoaga e tatala ai lenei fono tele, ae i le mataupu lava ia o le faatautaiga o le tiute faafomai, na matuā ave ai le faamamafa a le taitai o le Malo i le itu lea, e tatau lava ona aua ne‘i ‘alo fomai e ta‘u le mea moni ua tulai mai i se gasegase.
O se faataitaiga malosi na ia faatusa i ai le leaga o le lē tautala sa‘o, o le sauniga o le afā fulifao o Ofa lea na ia ta‘ua ai, e toulu lava niu ma laau ua amata foi ona featofai solo fale ma nisi o meatotino, ae o le la e ta mai lava i luga o leitio savili malolosi ma matagi to faata‘uta‘u, ae e lē o ta‘u sa‘o mai le malosi ma le telē o le aafiaga o le afā ua oo mai lava i Samoa.
O le lē ta‘u sa‘o mai o le afā na faaalia e le alii Palemia, na mafua ai lava ona tele vaega o Samoa na matuā afaina auā e oo mai lava le faalavelave o tau fuafua lava se tala e ave i le atunuu.
A tuu la i le auaunaga faafomai, na ta‘ua e le alii Palemia, o le atugaluga tele, o le lē ta‘u sa‘o o gasegase e matuā telē le aafiaga ae faato‘ā iloa mulimuli e le tagata.
