O le aso lea, sa ma nofonofo ma ai a ma aisakulimi i totonu o se tamai faleaiga i taimi o le aiga o le aoauli, ae tei ua muamua fai lana tala. “Fai atu foi la o oe, a ea, ua atoa lelei le fa tausaga e te lei toe fesili mai lava pe ta te faaipoipo.
O le a le mea ua tupu? Ua sui lou mafaufau?” e sosoo a ana fesili ma ata. “Ae o le a sou manatu?” ua faatalasua atu i ai la‘u fesili. “O lo‘u manatu, ua ala ona e le toe fai mai, ua e fefe ne‘i e toe fesili mai ae ou teena foi lou manao,” o lana tali lea. Sa ou taumafai e taofi la‘u ata a o o‘u fia lototele atu, “E le o lo‘u manatu lena. Aua e oo mai lava i le asō, e te lei teena moni a‘u.
E te lei faapea moni mai lava, a mea e Leai.” Na pei o le a le oso mai, “Ae ā lea na ou fai atu leai, a o tai ono o ta tausaga!” Ua ou tei i lana tala lea, ma ou faapea ifo i lou loto, ‘Ta fia ola e, o lea na te manatua lelei lava mea uma.’ Ua atili ai le gau o lou loto i lenei tamaitai.
Na ou sali ae le aisakulimi i lau sipuni ma ou tuu atu i lona fofoga e peiseai o loo ou fafagaina o ia, ona ou faapea atu lea, “Ia e sa‘o oe, na e teena muamua au.”
Ona toe fai mai lea a o tofo i la‘u aisakulimi, “E ā la?” Ua ou tali atu, “Leai.” Na ou vaaia ua faasesepa i luga ona mata, ua leai foi ni foliga ataata sa iai, ma ua leai se isi ana tala e toe fai mai.
Ua ou toe fesili nei, “E a la, Faamata e te manatu ua sui lo‘u mafaufau?” O foliga e pei e musuā a o faapea mai, “Ia tailo ia oe ia.” Ua atili ai ona aulelei i lau vaai a o atagia mai nei foliga musuā.
Sa ou tilotilo atu pea i ai mo ni nai sekone ona ou toe faapea atu lea, “Ae a pe a fai mai loa e oe lena fesili ia te au i lenei taimi, nai lo lou toe fesili atu foi?”
“E a lau tala, e fai atu e a‘u?” ua toe faasesepa foi ona mata e pei e tetee mai. “Ioe, fai mai e oe. O le ā se leaga o lena mea?” Ua toe tetee mai, “Oi e leai.” Ua ou ata nei ma fesili atu, “Lona uiga la o lau leai o lena ua e teena mai au?” Na pei o le a le vave o le toe oso mai, “E leai, e le o le uiga lena o lau tala.”
Ona ou fai atu loa lea, “Lona uiga o lena ua e Ioe mai?” Ua toe ata faamaela nei ma faaeto mai lona laulaufaiva ia te au, ona o lea ua ia mateia nei le mea sa ou taumafai e fai, ona toe faaauau lea ona ai lana aisakulimi.
Na ou iloa lona taumafai e faapasi ese lea mea sa ma talanoa ai, ae na ou tago atu ua aumai lona lima ma faataatia i luga o lo‘u lima, “Tamaitai, faaipoipo mai loa ia te au.”
Ua faamimigi lona isu ona fesili mai lea, “Ae ua e mautinoa i lau mea lea ua fai?” Ua ou pupula sao atu nei i ona foliga, “Lau pele ea, i lou loto atoa ou te faapea atu ai, na ou mautinoa mai lava lo‘u manaoga lenei, a o faatoa ono o‘u tausaga.”
Ua toe sulugia au i le lalelei o lana ataata, a o luelue mai lona ulu ma ioe mai ia te au.
