Na o le ata lava ma tago mai po lou lima, “O a au faaipoipoga o lena e te laititi!” Na pau lena o lana tali, ona toe faaauau lea ona faamatala mai ana solo sa tusi.
O le lona lima o taimi na toe folasia ai lou fanoga ia te ia, o le aso na ma faauu ai i le kolisi. Ua tai luasefulutasi o ma tausaga. Na matuai ou tootuli ifo ma le fuarosa i ona luma ma augani atu, “Poo le a e talia ea lo‘u nei tagata faatauvaa e fai mau tane faaipoipo?”
Ua toe ata foi, peitai ua tali mai nei, “E ese lou vavevave. Faapea lava a‘u sa e manao e te faigaluega muamua pe a uma lou faauuga, e sa‘o la‘u tala?” Ua faamimigi atu i ai o‘u tauau, ona ou tu ae lea i luga ua ma savavali atu i le hall lea e fai ai le faauuga.
Ua faasolo pea taimi, ma e fa tausaga mulimuli ane sa ou faigaluega ai i lou tomai na ou faauu mai ai, ae ua mautu foi lau galuega i se tasi o kamupani suetusi iloga i totonu o lo matou atunuu.
