O le taimi lona tolu na ou toe fesiligia ai foi ina ia ma faaipoipo, o lona aso fanau ina ua faamanatu lona sefuluono tausaga. Sa matou o uma ma isi a matou uo i se tafaoga, ma a o faasolo a matou taaloga, sa maua le avanoa na ma nofonofo ai na o maua i lalo o se laau mafalā.
E iai se tasi o a ma uo sa fai sana tala malie a o fai le taaloga, ona faafuasei ai lea ona ata faamaela le tamaitai. Na ese ai foi lau faalogo i lena taimi, e peiseai o ni logo tagitagi o ni pesega malie o loo ou faalogoina i lona siufofoga.
Ua ou autilo solo ma tau atu lau vaai i se laau fua matagofie o loo ola i autafa o le laau telē lea ma te nofonofo faalagolago i ai. Ua ou tau mai le fugalaau ma tuu atu ia te ia, ona ou toe fesili foi lea, “E mafai ea ona avea oe ma a‘u avā?”
Ua toe ata faamaela foi, ona tago mai lea sei atu le fugalaau ma tamoe atu i le itu o loo fai ai le taaloga e aunoa ma se tali mai i lau fesili. Na ou tu ae i luga ma mulimuli atu i ai.
O le taimi lona fa, ina ua atoa le tai sefuluvalu o o ma tausaga.
Sa ma saofafai i se laulau i totonu o le faleaiga a le matou kolisi ma inuinu a ma vaiinu a o ia faamatala mai ia te au le manaia o lana solo sa tusi. Na tele ma isi ana tala na fai ma ata, ae na o lou saofai lava ma matai ona foliga lalelei. Ua taofi faafuasei lana tautala ma faapea mai, “O le a le mea ua tupu?
O le a le mea ua le fai ai sau tala?”
Sa ou pupula sao atu i ona mata, “Ou te fia faaaluina aso uma o totoe o lo‘u olaga e faatasi ai ma oe. Poo le a e faaipoipo mai ea ia te au?” Ua toe fai foi lana mea na fai muamua.
