Ua ma savavali atu i le pito o loo tutu uma ai isi paga a teine ma tama, ona matou faatali lea mo ni faatonuga mai le pule aoga i le taimi matou te o ai i luga o le foloa e fai ai le siva.
Ua sau le faatonuga ona matou savavali atu lea, ma faatulaga loa matou tama i le itu taumatau, e faafesagai atu i teine o loo tutu mai i le itu agavale, o loo faatali ai le pese.
E lei iai so matou vava mamao, ma i le taimi atoa o loo faatali le pese, ua na o lou sioa atu ia te ia a o fetuleni ae le mau mafaufauga i lou ulu, ua tauau ai ina ou le uai lelei atu i tala a le puleaoga lea e fai ane. Na tilotilo mai o loo ou faataupupula atu pea ia te ia, ona ata lea ma tuu mumusu mai lana fesili, “Shh, o le ā ea le mea lena e te sioa i ai?”
Ua ou tei ona ou ata lea ma sosoa atu lau fesili le afeia, “Pe mafai ona ta faaipoipo?” Sa taumafai e tau taofiofi lana ata, peitai na iu lava ina pa leotele lana ata.
Ou te lei ma ai, ae ua atili ai lou faavalea ia te ia, ona o le faateteleina o lona aulelei a o mimigi ae ona mata e toetoe lava moeiini i lana ata mai ia te au.
Ua faamaonia ai lava i lou mafaufau o ia o le agelu, ona e peiseai o loo ou iloa atu ni fetu i ona mata ia ua susū a o ata. Na feauga le fai ifo o lana ata, ae sau loa le faatonuga ua tatau ona toe faatasia paga ma agai atu i le foloa.
E lei tali mai i lau fesili, ae na ona laa mai lava i le itu o loo out u atu ai, toso atu lou lima ma savavali loa i luga o le foloa.
