Ua lagalagā nisi o finagalo i le talosaga a le Ao o le Malo e tofia se komisi suesue e silasila i le feteenaiga ua aafia ai ma Lufilufi ona o mataupu faalotoifale e faasino i Mulinuu ma Sepolata‘emo.
Faaalia e nisi o le au faiupu o le atunuu sa fesiligia ni o latou lagona, o tupe a le Malo ma le atunuu e alu pe a faia le komisi suesue i se mataupu e lē aiāina fua e le lautele o le atunuu, ae na o le tama-aiga ma lona nuu o Lufilufi o loo faasino i ai.
O loo manatu foi nisi, pe afai e valaau ni molimau e lē komisi suesue e saili ai le moni ma le sa‘o atoatoa o feteenaiga i le eleele o loo mafua ai le feteenaiga, ua na o i latou lava e faasino i ai lea mataupu e auai, ae o le lautele o le atunuu e lē aafia.
Ua maua i sailiga a le tusitala o le Ao o le Malo na ia talosagaina se feiloaiga ma le Palemia ma lafo atu i ai lona manao i se komisi suesue.
O loo talitonu le tama-aiga e ui e faapea o se mataupu i le va o ia ma Lufilufi, ae na mafua ona seei i le tofiga Ao o le Malo ona o le matai.
O se taimi muamua lenei o le a faia ai sea komisi suesue e sailiili ai ni mataupu faalotoifale ua vesia ai le siosiomaga o se Ao o le Malo o Samoa ma lona nuu ma lona aiga.
O le 40 ma ona tupu tausaga sa seei ai le Tapaau Faasisina i lea tofiga ina ua tuumalo Tamasese Meaole sa la seelua o Ao Soofaatasi, e lei faia se komisi suesue e sailiili ai ni faaletonu i lona lotoifale.
Faaalia e se tasi matai, o feteenaiga sa tulai mai i lea vaitau i le va o le Tapaau Faasisina ma nisi o lona aiga ma lona nuu, sa agiga i se tulaga faalauaitele i lipoti a nusipepa ma leitio, e lei faapea lava na faatuina ai se komisi suesue.
O lalo o aiaiga o le Faavae o le Malo Tutoatasi o Samoa o loo aiaia ai, le lē mafai ona molia o le Ao o le Malo i se solitulafono.
O le aiaiga lea o loo finauina e le Tui Atua e lē mafai ai e Lufilufi ona faatea ma faatulai ese o ia ma le nuu e pei ona agiga i se vaega o lona finagalo i le feiloaiga ma tusitala i le Aso Lua ua mavae.
E lei mafai ona maua i sailiiliga a le tusitala pe o aiaiga o le faavae na ta‘ua e le tama-aiga o loo aofia ai ma mataupu faalotoifale i totonu o le aiga ma le nuu o se Ao o le Malo.
