Ua mautinoa nei le agai mai o le alo iloga o le atunuu o Sonny Bill i Niu Sila nei e tulutuli sona avanoa i le ofu uliuli, pe a mae‘a lana fusuaga i Ausetalia i le aso 30 o le masina nei.
O lea fusuaga o le a faia i Sini e tala malae ai i le paga faapitoa o le po a le alii o Anthony Mundine e tetee atu ai i fualaau faasāina.
Peitai ua faailoa le popolega o le Ofisa Sili o le Lakapi a Niu Sila ia Steve Tew, ina ne‘i te‘i lava ua lavea ai le alii ma avea ma tulaga e faaletonu ai fuafuaga o le agai mai e taalo i le Taamilosaga o le NPC.
O le isi itu na taua e Tew atonu e aogā lana fusuaga e faaauau ai pea lona malosi e ala i ana toleniga o loo feagai ai, ae afai ae faamanu‘alia ai le alii, e tatau i le Iuni Lakapi ona fai vave i ai se togafitiga ina ia toe vave faafoi lona malosi.
O le taimi lava e mae‘a ai le fusuaga, o le taimi lava foi lena ua tatau ai ia Sonny ona oso loa i le vaalele ma malaga mai loa i Niu Sila nei.
O le filifiliga lava a Sonny e fusu o lana lea faitalia e pei ona ta‘ua e Tew, ae na faaalia e le alii taalo o lana fusuaga mulimuli lava lea ona lē toe fia ta‘ua loa lea o se fusuaga se‘i vaganā ua tau lau o lona faamoemoe mo le Olopeleki.
E fia mafuta muamua le alii i si ona tina i Aukilani a o le‘i agai loa i sana Kalapu o le a filifili e taalo ai mo le NPC, ae toatele o loo taumate le ono fiafia o le alii ia Counties Manukau ona o lana uo o Tana Umaga.
O le Kalapu a Canterbury isi lea e finau malosi ia SBW, ae o loo lipotia foi le naunau i ai o North Harbour i alii faiaoga sa avea muamua ma Olopeleki ia Jeff Wilson ma Graig Dowd.
O ni lipoti mai le Ofisa Sili o le Iuni Lakapi na ta‘ua ai le tele o kamupani o loo nofo tatali e lagolago le taunuu mai o Sonny Bill, ma e faapea foi ona ono toe agai mai ma le Adidas o se tasi o kamupani malosi i lagolago o taaloga e pei foi ona sa latou faia ia Lomu, auā lava le alii Samoa o Sonny Bill.
O se tala fiafia lea i le Iuni auā o le a tele ai ni seleni i ala o faalauiloaina ma fesoasoani ai i le totogi o le alii taalo.
O lona uiga, a o lei sikepu Sonny Bill i totonu o le mae‘a i le aso 30 o Iuni, ae ua amata ona popole le Iuni Lakapi ne‘i te‘i ua lavea.
