O se vaega faaopoopo i le olaga taumafai ma le taleni e pei ona faatinoina
E pei ona ta’ua i le lomiga o le vaiaso talu ai, o le sosooga o le talanoaga ma le afioga Toailetai David Tua, e agai i se isi o vaega o loo faatauaina i lona taumafai, a o maua ai le malosi, ma iai pea i lona valaauina o se tagata taalo i faipelega ma fusuaga.
Sa saunoa Toailetai, o le umi na iai i lona valaauina ma taaloga o fusuaga, o le auauai mai foi lea o faaaliga ma nisi vaega na te lei iloaina muamua. Sa ia manatu o le fusu poo le faipele, ua na o se taaloga ma se taleni mo ia.
Sa tuu atoa uma i ai lona malosi ma lona taumafai. Peitai o le agai pea e tulituliloa lana miti sa iai talu mai le amataga, ae ua taoto ane ai nei ma nisi o fuafuaga matagofie tele e talitonu, o le finagalo o le Atua mo ia ma lona valaauina.
Ua ia mautinoa o le fusu o lana lea misiona. O le misiona e pei ona ia ta’ua, o se avanoa e tatala ai lona mafaufau ma fesoasoani ai mo alo ma fanau a Samoa ma le Pasefika, ma soo se tagata lava. Sa ia manatunatu atili pea, ma mafaufau loloto i lea valaauina, ma ua faamaonia o se vaega lava o lana taleni ma lona taumafai.
E le na o le faafiafia i tagata, ae ao foi ina faafiafia i lona Atua ma lona Matai, e ala lea i se galuega mo lona viiga. Ua ia tautino foi o lona savali i totonu o le maea fusu, e tatau lava ona iai se feau ma se taua e momoli ai mo soo se tasi e mafai ona matamata ai. O soo se taimi foi e tapena ai mo ana taaloga uma o totoe, e ao lava ona faia mo le viiga o le Atua.
O le manumalo foi, o se vaega o le olaga taumafai ma le olaga saili, ma o se lagona faagaeetia ma le fiafia. O le manunmalo, o se ata mautinoa o le tagata e faalgolago, ma ola mo le Alii.
O le faaogaina o taleni ma agavaa e pei ona valaauina ai lona lava tagata, ua ia mautinoa na filifilia lava e le Atua, ma e iai le mafuaaga o loo faamoemoe i ai ma lona taunuuga.
O le ala foi lea ua manatu ai ua tatau ona faagaioi ma amata loa ona fai se faiga e faaoo ai le amataga fou ma lona naunautaiga mo tupulaga.
O le a le misiona?
Ia fesoasoani mo tupulaga talavou
Na ta’ua e David Tua, e tele auala e mafai ona faaaoga ai lona tagata mo soo se fesoasoani manomia e tupulaga talavou. Ua manatu i lea tulaga ona e pei ona sa ia faailoa muamua, o se valaauina e faaopopo i lona taumafai.
E mafai ona faaaoga le taleni fusu, ma taimi o koleniga e momoli ai nisi mafaufauga taua ma le mautu mo tupulaga talavou.
O taimi o koleni ma faamalositino o nisi o luitau ma o se isi lea o taimi taua tele, e faigofie tele ona tatala ma fefaasoaai ai mafaufauga ma lagona o alo ma fanau.
O le tele o taimi e talanoa ai i taleni ma agavaa, o le a avea o se faamalosiau taua mo nisi talavou o tau maua i le faapaie ma le faapalapala.
O le iai o se isi mafutaga e aofai ma tuufaatasi i ai tupulaga e ese mai i totonu o aiga ma ekalesia, o se avanoa lautele e faailoa uma ai metotia ma aga malie o loo nana e isi. O suaga ma tala malie, e faaosofia ai lagona o le fiafia ma le manao e mafuta pea ma fesootai.
A o le auga lava ma le autu, ia o faatasi taleni ma agavaa ma le iloa lelei o le Atua. O se tasi foi lea o a’oa’oga e mafai ona a’oa’oina ma faasoasoa i totonu o mafutaga a tupulaga talavou. O le sailia o galuega ma fesootaiga i sootaga faaleaiga o le isi taua lea o faatasiga e faia.
O le misiona ma le faamoemoe lea o le susuga ia David Tua, ua taulai nei i ai lona faamoemoe ma lona mafaufau, a o iai pea i lona valaauina o se alii fusu. Ua iai foi ni suiga i totonu o le fale koleni o le alii taalo, ma ua fausia faapitoa lava ina ia fesootai ma lona faamoemoe e pei ona talanoa mai ai.
O loo taumafai ia avea lona fale koleni ma nofoaga e fiafia ma faatosina atu i ai talavou e feiloai ai ma fiafia ai e aunoa ma nisi o vaega e masalomia ai le tagofia o le ava malosi ma nisi faafiafiaga le talafeagai ma o latou olaga.
O le taimi nei, ua agai i ai le toatele o tama taaalo, o alo ma fanau a Samoa e pei o Isaia Toeava, Orene Ai’i, Brad Mika ma isi, e faaaoga le nofoaga ma le fale koleni o Tavita mo faamalositino ma feiloaiga e pei ona naunau i ai Tavita.
O se tasi o vaaiga sa maitauina e le Samoa Times, o le auai faatasi uma i le taimi o tapenaga a David Tua, ma le faia faatasi o gaioga i totonu o le maea ma vaega ua saunia.
Na ta’ua foi e Tavita, ua tele sona faamalosi ma le lagona fiafia ona o le auai ane o alo ma fanau e galulue faatasi ma fesoasoani le isi i le tasi, ae mo ia foi, o se tasi lea o faaopoopoga i lona malosi ona o le vaai pea i ona uso.
E le o toe mamao, ona tatala aloaia loa lea ma faalauiloa le taumafaiga ma le misiona a le alii taalo le afioaga ia Toailetai David Tua, mo tupulaga talavou.
