Ua feiloai le Tausi Matagaluega ma lana aulotu fou o Atinitone i Kalaiesetete
I le mae‘a ai o le Koneferenisi aoao a le Ekalesia Metotisi i Fogaa Faleula ma le suia o laau o le faatoaga e ala i lana tusi tofiga o lenei tausaga 2010, lea ua filifilia ai le susuga i le Tausi Matagaluega o Neru Tiatia ma le peresitene o le auso le faletua o Makerita, o i laua sa tausia le aulotu i Vaivase-uta ua siitia mai nei i le matagaluega i Atinitone, se tasi o aulotu malosi o le sinoti a Niu Sila i Saute.
Ua fesilafai ma fetala‘i i le Tala Lelei, ua faatasia i magafetau soifua, ua vaelupe maua ae lē vaelupe saa, ina ua feiloai fiafia le susuga i le faifeau ma lona faletua, faatasi ma le matagaluega i laueleele ma le fanua o le lotu i Atinitone, lea sa faataunuuina i le Aso Toonai na sei mavae atu nei aso 14.08.2010.
E faigata le afio mai i le paia o le Fuaifale o le aiga Salevalasi, maliu mai lau tofa i le Vainalepa lau fetalaiga Tiatia.
Maliu mai Togia‘i ma Faalaa ma le mamalu ia te oe Salemuliaga, ae tainane e faigata le afio mai o lau afioga le matua Tofaeono, susū mai Asi ma Patu, susū mai le Tuiataga ma le Usoalii, ma le mamalu ia te oe Fuata.
O afioaga o Neru Tiatia, o Gataivai ma Lalomanu, ae o le faletua o Makerita Vaai Tiatia, o le alalafaga o Maagiagi, Faleaseela ma Vaiala ma e toalima nai o la alo. Na iu mai le kolisi faafaifeau i Piula i le 1990, galulue i le ofisa i Matafele mo le ono tausaga, a o avea Makerita ma faiaoga i le Wesley College.
Na tofia e galulue i le matagaluega Metotisi i Tiavea-uta i le 1996, ma toe siitia atu i Vaivase-uta i le 2003 mo le fitu tausaga, lea la ua siitia mai i Atinitone i le 2010.
Na muai amata le sauniga i le lotu faafetai sa taitaia e le tausi matagaluega, susuga Ale Palelei ma ia faamamafaina i lana lauga nisi o mau “Ia faanaseriina le tagata mo le Atua”, o le tagata ua ta vavae ese ma ua kopanoina mo le faamoemoe o le Atua, e ao ina mataala nei lē tau le galuega folafola na valaauina ai.
O le Aufaigaluega a le Atua o loo fetaiai pea ma luitau aemaise ina nei faaseseina i faatosina o le lalolagi, a ia faalologo ma tafatafa i le Atua o le malosiaga lea o le galuega.
O se aso na faatumulia i le aufaigaluega Paia a le Atua mai le faletolu i Kalaiesetete, susuga Poasa Leaupepe, susuga Masele Tolai (Invercargill) faapea le susuga Time Taotua EFKS, o le failautusi o le mafutaga a faifeau i Kalaiesetete, susuga i faifeau malolo Lasalo Tuilagi ma Elisara, na auai le toatele o sui mai aulotu o le sinoti, aemaise sui mai nisi o ekalesia i totonu lava o le aai faatasi ai ma le mamalu tele o aiga ga lua o le faifeau ma lona faletua na malaga mamao mai Samoa, Aukilani ma nisi itu o le atunuu.
E pei ona masani ai tulaga o aso faapenei i le alo atu i le aliitaeao ma le usu a lele i le matagaluega i Atinitone, sui o le faletolu i Kalaiesetete, se ava foi mai le mamalu o malo usu na auai, aemaise se ‘ava a le susuga i le sea o le sinoti Rev Sava‘i Loto na molimoli mai e le komiti tumau, Matua Kuresa o Invercargill.
O le fetalaiga Levaopolo Sakaria na sufi ava, ae o le tulafale o Tiatia Eneliko sa fetalai ava.
O le lauga faatali mai le matagaluega na saunia e le fetalaiga Aliitumua Poutoa, o le toe ulutaia Samoa o le aulotu, i le mae‘a ai ona lele o le ti‘a malie, ona lauga fetalai lea o le tofa i le vainalepa, Tiatia Penisio malaga mai Samoa mo le momoliina mai o le latou taulaga soifua ma tuuina atu i aao o le aulotu i Atinitone.
Na alo ava ina ua mai vai ae suamalie ava i le alofa o le Atua lea sa faasoaina e le fetalaiga Mafuao Tuua, o se aso felanulanuai ma ua tepa i ula, tepa i Matagofie lenei aso tuupoina. Na tapenaina foi le laulautasi mai aulotu na auai aemaise malo asiasi, pei o le afioga Afamasaga (Dunedin) ma le fetalaiga Ili Faasootau.
O faaaloaloga maualuluga na alo atu i ai le mamalu o aiga ga lua, saunia mo le aufaigaluega, o matagaluega o le sinoti, aemaise le mamalu o Samoa potopoto, ua malie le suavasele i lau pule ua sapaia faatuaeleele, ua titi manu ua lava manu i faiva o faaaloaloga o le aso.
Na saunia foi le taumafataga e tali ai le sua, o le failautusi o le aulotu susuga Faalafi na fai ma sui o le aofia e faafetaia le agalelei ma le ma‘au o le paia i aiga ga lua, ia ona taape lea o le aofia na auai, ae tuu le avanoa e fesagai ai le aulotu ma le latou faifeau fou ua taunuu.
Ua fesilafai ma fetala‘i i le Tala Lelei, e avatu ai ma faamanuiaga a le Samoa Times ina ia manuia tele le galuega i totonu o le matagaluega o Atinitone.
