O se vaega lea o le saunoaga tuualalo a le afioga ia Masoe Stephen Betham, le Faiaoga a le au Taitoafitu a le Manu Samoa i le faaafe na faia e le afioga a le Peresitene a le Iuni Lakapi a Samoa i Niu Sila nei, Aiolupotea John Roache.
O le maota lava o le afioga a le Peresitene i Magele lea na faia ai lea faaafe i le aoauli o le Aso Sa, ina ua faato‘ā taunuu mai le au mai Samoa e agai atu i Peretania i vae e lua o le Taamilosaga o loo totoe i Lonetona ma Sikotilani.
O le faato‘ā maua ai lava lea o se avanoa e faatino ai se faaaloalo ma molimoli se faafetai a Niu Sila nei talu ona foi mai le Manu ma Ipu e tolu o le Taitoafitu i Amerika, Ausetalia ma Hong Kong, lea la ua auala lea faafetai tele ma le agaga faamalo aemaise le loto ua faamalieina, i le faaafe lenei e ala i se toonai matagofie na tapenaina e le Iuni Lakapi a Samoa Niu Sila.
O le afioga a Vui Vitale o le Sui Peresitene o le Iuni a Aukilani Samoa na faafeiloaia le aumalaga ina ua to‘ai taunuu i le maota o le afioga a Aiolupo ma le faletua ia Ula i Magele, ona sosoo ai loa lea ma le sauniga lotu puupuu na saunia e le susuga a le Peresitene a le Counties Manukau Samoa ia Gago.
O le saunoaga autū lava sa faia lava e le afioga ia Aiolupotea John Roache o le Peresitene o le Iuni a Aukilani Samoa ma Samoa Niu Sila. Fai mai Aiolupo sa manatu lava e matuā tapena se faataliga a Niu Sila mo le Manu Samoa ina ua a‘e ma le manuia le taamilosaga i Hong Kong, peitai o le finagalo o le Palemia e malaga sa‘o atu le au i Samoa, lea na lē mafai ai ona faataunuuina se faamoemoe ona e lei afea Niu Sila nei.
Peitai o le agaga fiafia tele ua lē mafai lava ona taofia ai le faaaloalo maualuga e pei ona faatinoina ananafi, faapea foi ona faailoa e Aiolupotea le lagolago ma le mitamita o Niu Sila nei i le au Taitoafitu a le atunuu, aemaise o le alii Faiaoga i lona tulai mai.
O le mae‘a o le saunoaga a le afioga a le Peresitene ma momoli foi nai meaalofa ma se faalavalava mo le alii Faiaoga ma le au, na sosoo ai loa ma le taliina o le sua, matagofie tapenaga i le itu tau taumafa, ia ona saunoa mulimuli ai loa lea o le alii Faiaoga le afioga a Masoe Stephen Betham ma faafetaia le faaaloalo ua saunia.
Na faamae‘a ai loa i lana tuualalo i le paia ma le mamalu na auai, ina ia manatua pea i latou i talosaga, ona e le faigofie le faamoemoe.
O le faaiuga la o le vaiaso le Taamilosaga i Egelani, ona faamae‘a lea i Sikotilani i le vaiaso e sosoo ai. E tasi le suiga o le au a le Manu lea ua iai, ua siu ai le alii o Alatasi Tupou ia Paul Chang Tung, ae o lea ua toe malolosi Afa Aiono ma Reupena Lavasa, ma o se tala fiafia lea mo le tapenaga a le Manu. E manaomia se malo se tasi i vae e lua o totoe ina ia siamupini ai i le tuufaatasiga o ‘ai i lenei tausaga. GO MANU! O tou māmā na!
