Ua tautino lē sa avea ma taitai o le Itu Agai, ua sili ona malosi le Tautua Samoa i le taimi nei ina ua mae‘a le faigapalota. “O le mea lea e iai le matou vaega faaupufai o le matuā malosi lava, ma ua sili atu ona malosi i le taimi nei”.
O le finagalo lea o le Aloalii le afioga Vaai Papu Vaelupe, ina ua fesilisili tusitala i sona finagalo e tusa ai ma lona lē toe avea ma faipule o Vaisigano Numera Tasi ina ua faamaonia moliaga o faatosina faaalatua sa tuuaia ai i se tagi tau palota.
Ua lē toe seei ai i le tofi taitai o le pati o le Tautua Samoa lea ua faatalitali nei poo ai o le a tulai mai i lea tofiga tāua auā o le taitai foi lea o le Itu Agai.
“Ua avea nei le afioga Palusalue ma taitai i se tulaga lē tumau, ae se‘i taunuu uma mai faipule e toalima o lenei vaega o loo i fafo ona faato’a faia lea o se filifiliga”, na toe saunoa ai Vaai.
Na faaalia foi e le Aloalii lona lagolagoina o le sui taitai e see atu e taitai le vaega faaupufai. “Ioe o le sa‘o lena o se lagona ia te au, ae se‘i feiloai le matou faafaletui”.
Ua faailoa se finagalo o lē sa avea ma taitai, ina ua faailoa mai foi e le sui taitai le taatia pea o le tofiga taitai se‘i feiloai faipule e to‘a 12 o le Tautua Samoa, ina ua agiga ni lagona faapea se lipoti ua ta‘ua ai e ao i le faafaletui ona filifilia nisi faipule e ese mai le afioga Palusalue Faapo II e avea ma taitai.
O le faipule o Falealupo ma le faipule o Vaimauga i Sisifo o loo iai ni lagona o le au lagolago i le vaega faaupufai poo i latou na palotaina ia faipule e toalua e sui se isi tamalii e tauaveina le tofiga.
“O le matou vaega faaupufai ua iai taiala ua taoto ma o le galuega lea na feagai ma le afioga Vaai a o tulai i le taitaiga ma ou te faafetaia ai o ia, auā ua avea ma faasinoala mo le Tautua”, o le finagalo lea o Palusalue.
E ui e faapea e otometi ona faasee le sui taitai i le tofi taitai ae na faaalia e Palusalue, e lē tuua ai le va fealoaloai i tu ma aganuu faasamoa i le soalaupule i totonu o le mataupu.
“O loo iai nisi o loo taumafai e faamalepe le maopoopoga o le matou vaega ae ou te ta‘u atu ua matuā malosi le Tautua Samoa”. O le finagalo o Vaai Papu lea na foliga e tali atu ai ini taumafaiga e sosofa le maopoopoga o le vaega faaupufai pe afai o iai nisi o manatu e tupu se tulaga faapea pe a toe sailia se taitai ma se sui taitai.
O Vaai ma Palusalue na tofia a o loma le faigapalota tele e avea ma taitai ma sui taitai auā tapenaga o le faiga filifiliga a le atunuu, peitai ina ua mae‘a le palota sa toe tusi aao i ai faipule e faauau pea e i laua ia tofiga, lea ua avanoa ai le tofi taitai ona ua faaleaogaina le tofi faipule o Vaisigano Numera Tasi sa manumalo ai le afioga Vaai Papu.
O loo iai masalosaloga o nisi o le au lagolago a le Tautua Samoa, o nisi i fafo atu o le lio o le Tautua Samoa o loo taumafai i ni auala e vavane ai i fafo le maopoopoga ua iai le vaegafaaupufai.
“O la‘u tala moni e lē pepelo, e lē mafai ona toe malepe”.
