Na faigofie lava i tagata ona latou iloa le faafuasei ona fiafia le tamaitai o Sioli e talatalanoa i si tama o Kevi, seia oo ai lava ina salalau tala, ua fai le faigauo a Sioli ma Kevi. Na fiafia foi le tina o Kevi i le tala e uiga i si ana tama, ona sa mamao i le mafaufau o le fafine o Peti o le a iai se teine e fia faaipoipo ia Kevi. O isi uma tagata o le aiga, aemaise lava tausoga teine o Kevi, na matua tetee mai i le faigauo, ona ua latou iloa lelei le ituaiga o tagata e iai Sioli, ma le pogai tonu o le faafuasei ona manao e nonofo ma Kevi.
Na oo ina fai le faaipoipoga tele, ma e iloa atu lava foliga masiasi o le tamaitai faaipoipo i si faatoafaiava. Ua alu pea le mafutaga ma ua fai foi tamaiti, ma na faamanuiaina e le Atua lenei mafutaga i se fanau se toatolu, e lua teine ma le tama e toatasi. Ua maua lelei le mea na manao ai Sioli i si alii lapoa o Kevi, aua ua avea nei Sioli ma tamaitai Hawaii maoi, ma ua na o le feleleai solo foi i le va o Samoa ma Hawaii.
E pei o le mea fua ia Sioli le fealuai solo aua e faigaluega malosi si tamaloa o Kevi, ma tele tupe e maua ai, ae o le mea ua matauina e tagata, e le taitai ona taumafai Sioli e tauanau si ona toalua latou te o malaga faatasi mo se tafaoga, ae o lava na o ia ma lana fanau.
Ua latalata i le 8 tausaga o mafuta pea Sioli ma Kevi, ae ua matua manino mai lava le leai o se alofa moni o lenei tamaitai i si tamaloa o Kevi, ma e foliga o loo iloa lava foi e le tamaloa, o le mea lea e le taitai vaaia e tagata ni foliga fiafia ia Kevi, na o le faanoanoa ma e le tautala lava i le tele o taimi, sei vagana le galue malosi e tausi lana fanau, ma ave uma tupe e fai ai teuga auro lea e toetoe soo ai le tino o Sioli.
O le tausaga e 2006, na iu ai lava ina aliali le tupua lea ua leva ona tanumia e Sioli i totonu o le aiga, ma e leai se tagata e lei lagona le inoino i lenei tamaitai, ae ua matua misi alofa uma i si tamaloa o Kevi ma si ana fanau, ina ua faafuasei ona ninomo Sioli mo sana faiga malaga i se atumotu o le Pasefika, ae mulimuli ane iloa e tagata, o lea sa taotaotua atu ai ma le isi uso laititi o Kevi, lea e toetoe ono tausaga e va ai ma lenei tamaitai o Sioli, ae ua alu le la solaaga ma Sioli, ma e oo mai lava i le taimi nei, e lei mautinoa lava e le aiga poo fea le itu o le lalolagi lea ua faapupuna ai le tamaitai o Sioli, ma le uso laititi o lona toalua, si tamaloa lapoa o Kevi, lea ua nofo nei ma tausi toatasi si ana fanau.
