Ua latalata ina uma le pemita o Sioli i Hawaii, ae foliga mai lava e le faigofie ona toe talosaga nisi ona aso e nofo umi ai. Ua amata ona faanoanoa pe a mafaufau ua toe o se aga ona toe vaaia lea o foliga o si o latou tamai faleoo i Samoa, lea ua matua foufou gata nei ia Sioli le taimi o le a toe tau fofola ai ona falalilii i le po, ma toe taai i le taeao ma sulu i luga o uapou o le fale, ae tau susue mai pola e vaai pe ua tai ao.
O le naunau tele o Sioli e fia nofo i Hawaii, na tonu ai loa i lona mafaufau, o le a sei vaai ia se alii ma ia mautinoa o se tagata ua nofomau i Hawaii, ae o le mea na tupu, e faigata tele ona maua se isi o lana tupulaga, ona e fai si laiti tele o tamaiti, a o isi o nai toeaiina ua matutua. E tasi lava le isi tama e tau latalata lona matua ia Sioli, o si tama o Kevi, lea e fai ma mea ula a tagata o le aulotu, ona o lona tino lapoa.
O Kevi, o se alii e agamalu ma filemu ona uiga, ae ona o le matua uigaese o lona tino lapoa, e le taitai afea ai e se faitauga a se tamaitai. Ua iloa lelei foi e le tina o Kevi, e ono nofofua ai pea si ana tama e oo mai le faavavau, ona o le mataga tele o lona tino. O Kevi e iai si ona uso e matua atu ia te ia, ae e iai foi se vaega o lona tino e le atoatoa, lea e matua faigata ai lava ona faavasega e se tasi ana faamatalaga pe a fai.
Atonu e iloa lava e Kevi e leai se teine e manao ia te ia ma lona tino, o lea e le taitai ai lava ona ano Kevi i ni teine, pau lava lona fiafiaga, o le ai ma soona ai malosi. Ua fiu foi ote i ai a lona tina pe fautua foi iai tagata o le latou ekalesia, ae foliga ua fai lava ma le iloa e Kevi lana amio o le taumafa tele. Sei vagana la le uso matua atu o Kevi, le alii o Tonu, e ui a savali mai e toetoe lava sulu mai i luma, ae e iloa lelei e le latou aiga, lona manaonao e fia fai sona toalua.
O le tele la o taimi, e faaoso ai e isi loomatutua o le aulotu si tama o Tonu, e sau e faamalamalama ia Sioli lea e fia sue se tama Hawaii la te faaipoipo ma nofomau ai i Hawaii. Ma o le mea lava lena na fai e Tonu, e ui i le masiasi o si teine o Sioli ona e na o Tonu lava se tama ua iloa na alu ane sa faamalamalamaga ia te ia, ae ua salalau lava le tala i le aulotu atoa, ma ua avea ma itu ua musu ai ma Sioli e toe alu i le lotu a lona uso o Fana.
Ua nofo nei Sioli ma faatusatusa le auso lenei o Kevi ma Tonu, pe faamata e iai se isi o nei tama e mafai ona la nonofo, e ui lava e matua inoino mai o lenei tamaitai i nai tama uma e toalua, ae ua matua atuatuvale lava ona ua lata mai le taimi e toe foi ai i Samoa, a o lea e lei mautu se tonu o ona pepa.
