O le tausaga e 1998 na tulaueleele ai le tamaitai o Sioli i laufanua o Hawaii, ina ua totogi mai e lona uso matua o Fana lona pasese e alu atu ai e tafao ma nonofo ma lana fanau laiti ae alu Fana i lana galuega fou, o se faiaoga i se tasi o aoga tulagalua i le motu o loo nonofo ai. O le fuafuaga na iai e na o le tolu masina e alu ai Sioli e tafao i Hawaii, ona toe foi lea i Samoa lea o loo nonofo ai ma ona matua ma le isi ona tuagane matua.
Peitai ua alu ai alu ai le nofo a Sioli i Hawaii, ua foliga ua fiafia le tamaitai i le matagofie o le motu o fiafiaga, ma ua tele foi ana uo ua masani ma latou tafafao solo, o tagata uma o le aulotu a si ona uso matua o Fana, lea sa faamasani ma faaleuo ane i le tamaitai mai Samoa. Na iloa lelei lava e Fana ua le toe fia foi lona uso i Samoa, ma ina ua fesili sao i ai, na tali ane e moni, ua fia nofo mau i Hawaii pe afai e faigofie ona fai ni ona pepa nofomau.
O le auso lenei e ese le fealofani. O le mea foi lea na naunau ai Fana e aumai lona uso i Hawaii, e faasisi fua i le nonofo ma lana fanau, ae o le faanaunauga o Fana ia mafai ona aumai si ona uso la te nonofo faatasi i Hawaii, aua na o ia lava se isi o lona aiga o loo iai i lea atunuu tele.
Peitai o le faafitauli lea e tupu, o Sioli e le o se tagata sa malosi ma lelei ni ana aoaoga, ma e leai foi ni ona tomai e faigofie ai ona sue se galuega mo le faagaoioia o ni pepa nofomau. E le lava foi le toatele o lona aiga o loo i Hawaii, e fai agai i ai ona pepa.
E tasi le mea na saua i le faalogo a Sioli i le tasi aso i ni talanoaga a fafine o le lotu a lona uso, a o latou tafafao i se tasi o paka i le afiafi, fai mai e manaia pe a vaavaai loa se tama Hawaii la te mafuta, e na o le pau lava lena o le auala e mautinoa e ono faigofie ai ona fai ona pepa.
O le taimi muamua e lei fiafia Sioli i lea tonu, ona e leai ma se isi o tama ia ua masani i ai, e tau ai lona loto. O le mea malie i le tamaitai o Sioli, e le taitai ona mategofie e tagata o se tamaitai e vaivai le aoaoga, aua a oo ina fuli Sioli e faamolemole foliga i le pauta fai teuga, e muliga foi teine ia e sisiva i faafiafiaga a Laie, i le molemole ma le momosi o foliga o Sioli, ua tau le iloa ai o se teine mai le motu o le au suluie, ae tasi lava le mate o se teine Hawaii mai se isi motu.
