Vevesi pea Fausaga i le suafa SULA
O le mau lea a le alii ua tofia o le Pulenuu o le afioaga o Fausaga ina ua oo mai i lo tatou Ofisa i Apia e faaali lona finagalo, i le tusi a nisi o matai o le afioaga ua momoli ai lo latou manaoga e faatea Feto‘ai Isaako mai i le tofi Pulenuu o le afioaga.
O le lua vaiaso talu ai na auina atu ai le lipoti o le tusi ina ia faatulai ese le Alii Pulenuu o le afioaga.
O nei gaioiga uma ua faaauau ai lava feeseeseaiga ua tulai mai talu ona faaee le suafa Sula i se tamaitai o loo nofo ma faamautu nei ma lona aiga i Texas i Amerika.
O se alo faasino i le tamā o Vaafusuaga Ati o le tausoga o Toleafoa Mano, lea na ia tofia le tamaitai o Ofeira Gassaway ina ia faaee i ai le suafa SULA. O le suafa Taupou o Fausaga ua faasino i le Afioga Toleafoa aemaise le suafa Lamatia.
O se faaiuga o lea ua faaauau mai ai e oo i le taimi nei feeseeseaiga i le va o nisi o suli o Toleafoa ma Lamatia i Fausaga ona o le manatu o nisi, o loo tau foi i lenei suafa, ua lē uia ala o mea e pei o le logo lea e Toleafoa Mano o le isi itu o le aiga e logo i ai le manaoga o se saofai.
O le isi lea vaega o suiga ua matauina i lenei mataupu talu ona tulai mai, o le lē fiafia o le aiga o Sula Ofeira ona ua silia le taimi faatulagaina faaletulafono e tatau ai ona avatu le aloaia o le pepa saofai o le tamaitai ua faaee i ai le suafa taupou.
O le mau a matai o lea aiga, ia na saini i le tusi na avatu i le Matagaluega o Tina ma Tamaitai Atina‘e o Nuu ma Aga Fesootai, i lona vaega o Atina‘e o Nuu, ua solia ai e le alii Pulenuu le tulafono ma ua tatau ai ona faatea ona o le mau a lea aiga ua lē faia tiute faapulenuu o Isaako.
I le feiloaiga ma le alii Pulenuu na ia ta‘ua ai na lotea le mataupu lenei i le fono faalemasina a Pulenuu o Samoa lea sa faatautaia i le Maota o Pulenuu i le Eleelefou. O lea fono na tolaulau ane ai loa ma le tusi ua avatu e le aiga lea i totonu o Fausaga.
Faaalia e Isaako, o le Aso Gafua na sosoo ai na valaauina ai loa e le Ofisa Sili Lagolago o le Matagaluega lenei, le Tofa Maulolo Leaula Tavita Amosa se feiloaiga i le va o le alii Pulenuu ma le Ofisa.
“O le faamalamalamaga a le Ofisa o Pulenuu e leai se mea o le a faatea ai fua a‘u auā e le se suafa matai lea e fia fai se pepa saofai,” o le faamatalaga lea a le alii Pulenuu.
“O a‘u e tatau ona alu atu ai pepa saofai pe afai o suafa matai – suafa o tulafale ma tamalii ae ou te lē faia se pepa saofai o se suafa taupou, leaga e lē o se igoa matai. A tulai mai la ni nofo o ni suafa taupou e o lava le aiga latou i le Ofisa o Faamasinoga ia Masinalupa Tusipa ma talosaga i ai mo se pepa faamaonia o le suafa taupou, ae a mananao foi la ou te alu e fai lena galuega ia sa tatau ona talosaga mai ae ou alu e faafesootai ofisa o le Malo e tatau ona sau ai le faamaoniga lea,” o se tali mai lea a le alii Pulenuu.
“E lē o faatea la a‘u auā o loo lagolago e le Matagaluega lo‘u lagona na mafua ai ona ou lē faia ni pepa faamaonia poo lesitala o le suafa SULA. O le isi lava mataupu ua laga nei i le tusi na avatu i le Ofisa o Pulenuu, o le itu lea o le tele o matai ia e saini mai i lea tusi, o matai ua faatea e lo matou nuu – E faafefea la ona faatea ese e matai o loo i tua o le nuu se matai o loo i totonu lava o faigamea a le nuu?”
O le Aso Gafua faato‘ā mae‘a atu a le nuu na ta‘ua e le pulenuu na taumafai ai e talanoaina le mataupu i le tusi ma faamalamalama i le aiga na momolia o ia i le Ofisa o Pulenuu, le tulaga ua iai le faatalatalanoaga ma le Ofisa, ae e lei o atu nisi i le fono a le nuu. E lei toe talanoaina foi lava la le mataupu seia iai se taimi e feiloai uma ai itu uma o le mataupu.
Na fesiligia e le Samoa Times pe aisea na faia ai le iuga a le afioaga e faatea se tasi o matai o le nuu, Toeoso Taulauniu ae lē faasala le matai e ana le saofai le afioga lea a Toleafoa Mano.
O le tali a le Pulenuu, o Toeoso Taulauniu na ave i ai le aveai a le nuu na te momoli agai i le aiga o Toleafoa Mano ina ia taofi le saofai seia feiloai uma aiga ma ia maua se tasi o se nofo, peitai e lei iai se tulaga faapea na tulai mai, ma e lei logo foi e Toeoso Taulauniu le aiga lea na faaauau ai lava le faiga o le nofo e aunoa ma le logoina o le isi itu o le aiga o loo au foi i le suafa SULA.
O le lagona o le alii pulenuu e faigofie lava le mataupu pe ana “uia ala o mea” ma talanoa aiga uma ona faamautu ai lea o le nofo. Ae talu ai ua lē faia lea tulaga o lea la ua faaauau mai ai pea ia feeseeseaiga.
Faaalia e le alii pulenuu ua taatia le talosaga a le nuu ma le isi itu lea o le aiga o Toleafoa ma Lamatia, i le Faamasinoga ina ia faataatia ese le suafa Sula seia iai se taimi e maua ai se tasi i totonu o Fausaga.
O loo faaauau foi le finagalo o Toleafoa Mano, e leai se mea o le a taofia ai fua le suafa SULA ae a fia fai se SULA o le isi itu ona fai lea auā o le a ia lagolago foi i ai.
Ua i luma foi o le Faamasinoga se talosaga a le matai matua lea ua faatea e le afioaga mo tausaga e 50 ona o le lē logoina o le aiga e taofi le saofai sei talanoa itu e lua ma fai lelei ai se nofo o le SULA pe leai foi.
