(Dr Uilisone Taito, Voice of Christ)
O le aano lea ma le ‘auga tonu o le semina faapitoa e pei ona autovaa mamao mai ai le taitai o le Ekalesia Voice of Christ Full Gospel mai Niu Sila, le susuga i le toeaina ia Dr Uilisone Taito e pei ona tatalaina i le po o le Aso Faraile ua tuanai.
Na faaautu lava le feau i lea po i le matua na momoli mai e le faisalamo o Tavita, o loo tusia i le Salamo 51:10, “Le Atua e, ia e faia se loto mamā mo a‘u, ma ia e faafouina se loto mau i totonu ia te au”.
O se toe fafagu lava ina ia faatumauina ai le soifua auauna ma faatalitali i le aso tele o le Alii ua tau lata mai.
Na uluulu i finagalo ma sisii a‘e aao o le faalapotopotoga i le suamalie o le feau faalaeiau. Na ia faamamafa ai le faia lea o se loto mamā ma faafouina se loto fou i totonu ia te i tatou e mafai ai ona galo ni faaletonu ua tuanai i le va o ulugalii, mātua ma fanau i totonu o aiga, faapea Ekalesia ma atunuu, e oo lava i faalapotopotoga.
O lea loto e mafai ai foi ona lē toe maitau leaga le isi i le isi tagata, ae taulai le silasila i le faavae moni, o Iesu Keriso lea.
O se taumafa faaleagaga na vaaia le toatele o i latou na talia le valaau a o vaganaina e lana auauna.
Na ia saunoa foi e toe faamanatu le vaitaimi o le faaleleiga o le va o le isi uso i le isi uso auā e leiloa le oo mai o le taimi e valaau ai le Matai ae o lava tapena. Se‘i tatou manatu ia Iapani ua tulai mai se fuainumera ua toesea, sa lei mautinoa ae o ni lesona tāua ia. O le filifiliga o le loto e manuia ai, o le filifiliga foi a le loto lava ia e malaia ai.
O aso uma e taugalemu ai o loo saoloto ma solosolo lelei, ae o loo sau le aso tele o le Alii e lē mafai e se tasi ona tu atu seia vaganā le tagata ua fou lona loto.
O le lasi ma le felanulanuai o le alofa tuutulu‘i mai pea o le Atua i lana fanau ua lēe mafaitaulia.
O le soifua auauna ma le ola sailiili mo le Atua, e lē faatapulaaina lea vaega.
O nisi ia o manatu ma lagona e faaosofia ai pea le agaga fiafia ona e ui ina pesi mai fita o lenei soifuaga,peitai o loo faaauau pea galuega faaolaola agaga a ona tagata e lē gata o le Voice of Christ ae faapea foi le tele o isi fale tapuai.
O tala a le Tusi Paia, e iai aso e oo mai ai oge i le nuu, e lē o se oge i meaai poo se galala i se fiainu vai, a o le oge i le fia faalogologo i le afioga a le Alii, e tupu foi le faatuatua i le taulogologo.
Sa faapea foi ona auai mai foi le susuga i le toeaina ia Peter Lēpisi Lilomaiava malaga mai Niu Sila.
O le taitai o le ekalesia i Brisbane, o le susuga i le Toeaina ia Andrew Schmidt. E 3 aso sa faagasolo ai lea polokalame, ma e 4 Ekalesia Voice of Christ Full Gospel i totonu o Kuiniselani.
