E lei talia e le afioaga o Solosolo le auai o le afioga i le Faasisia i le faaleleiga a le nuu
Ua faailoa e le Afioga Leota Leuluaialii Ituau Ale i luga o televise, e lē mafai e se isi ona aveesea lona suafa Leota Leuluaialii na faaee e lona aiga ia te ia i le tausaga e 1965, seia vaganā o le tulafono. Ua faaalia foi e le afioga i le Faasisina, o se faamaualuga le finagalo o le nuu o Solosolo e pei ona faaleo e se tasi o matai o le afioaga, le tofa Leau Vaasa.
O le manatu e pei ona faailoa e le afioga i le Faasisila, e faasino atu i se faaaliga na faia e le tofa Leau Vaasa i se talanoaga ma tusitala, lea na ia ta‘ua ai, ua lē toe aloaia le faaaogāina o le suafa Leota o loo umia e lea tamalii i totonu o le latou nuu.
O le saunoaga a Leau Vaasa i nisi o tusitala sa auai i le lipotia o le faaleleiga, ua tele faaletonu ua aafia ai le nuu ona o lea tamalii ma na amata mai lava i le tausaga e 1990.
Ae i le faaleleiga na faia i le Aso Gafua o le vaiaso ua tuanai, ua faaalia ai e Leau ua manatu le nuu e talia loa le toe foi atu o aiga sa o ese, ona o loo iai se isi fuafuaga e faaulu se isi talosaga a le nuu i le faamasinoga faasaga i le afioga Leota Ituau Ale, i lona lē aloaia o le faaiuga a le faamasinoga.
Sa auai le faipule o le itumalo o Anoamaa i Sisifo i le faaleleiga a le nuu, o ia foi lea o le Sui Palemia, le susuga Fonotoe Nuafesili Pierre Lauofo. Sa faatasi ai foi ma isi paia maualuluga o le afioaga aemaise o faafeagaiga uma o ekalesia i totonu o le afioaga, e pei ona sa latou taitaia le sauniga lotu na tomua a‘i le polokalame o le aso.
Faaalia e Leau Vaasa e lē o le taimi muamua lea ua faia ai ni faaleleiga a le nuu ona o le vaeluaina. Na ta‘ua e Leau, sa tutupu foi ni feeseeseaiga a le afioaga i isi tausaga ua mavae, ae sa alualu lava ma toe suiga mālie ma toe foi i le tasi o pulega a alii ma faipule.
Peitai i se saunoaga a le afioga i le Faasisina i auala o faasalalauga i Samoa, na ia ta‘ua ai, o le a se‘i nofonofo ai mo lenei taimi, ae o le toe foi o nisi sa lagolagoina lana faiganuu i totonu o le pulega a alii ma faipule, o le latou lea aiā ma le faitalia.
