‘E le alo lau pulega i le faia o le mea tonu’ Komesina fou o Leoleo

O luitau nei o le nofoaiga a le Komesina fou ua filifilia, le afioga Lilomaiava Fou Taioalo, o nisi o faaletonu o loo tutupu ma aliali mai pea e vaemanu‘a ai le tautua lelei a leoleo, ma tele ai tala ma tusitusilima le atunuu i Malu o le Malo, ona o amioga a nisi alii poo tamaitai leoleo.
Na maua le avanoa o le tusitala e faatalatalanoa ai le Komesina fou ua filifilia ma sa ia tautino mai ai, o le a le ‘alo lana pulega i le faia o le amiotonu pe a aafia nisi o le au faigaluega i ni soligatulafono.
“Ou te puipui i le au faigaluega ma le matagaluega atoa, ae ou te le puipuia se leoleo e aafia i se solitulafono, aua e tatau lava ona fai le mea amiotonu”, o se finagalo lea o le afioga Lilomaiava Fou.
“E tele isi vaega e tatau ona faaleleia o le auaunaga ma le tautua, e pei o mataupu e faatoai mai mo ni suesuega, e tatau ona toe logo i tagata le tulaga ua oo i ai pe afai foi e alualu suesuega ae ua le maua ni molimau e ave ai le mataupu i le faamasinoga e ao lava ona toe logo tagata”, o le isi lea saunoaga a le Komesina.
O nisi ia o vaega o loo faasea ai le atunuu i le matagaluega, ae na taua e le komesina o mea laiti ia a lelei ona pulea ma ave i ai le faamuamua, o le a sologa manuia ai le tali atu a le matagaluega i manaoga o le atunuu i ni mataupu e manaomia ai le fesoasoani o le auaunaga faaleoleo.
Faaalia e Lilomaiava o loo faia pea suesuega a le vaega o le professional standards a leoleo i ni tuuaiga o le faaoolima faasaga i nisi o leoleo e toalima, ma ni leoleo se toalua i se isi mataupu na tulai mai i le lua vaiaso ua mavae.
O lea faaoolima na lipotia e se taulealea i le Toomaga o Tagata Puapuagatia.
Ua lagona e le Komesina lona agaga faafetai i le Malo i le filifilia o ia e tauaveina le matagaluega ma o lana saunoaga, e taua ma aoga le tofiga ua oo i ai aua o se tulaga lelei e iloa ai le siitia i se isi sitepu o lana tautua faaleoleo.
Ua ia faafetaia foi le Komesina sa tulai mai le susuga Papalii Lorenese Neru, ona o lana foi auaunaga i mea lelei sa ia faia mo le matagaluega.
E lei toe talosaga lea tamalii i le avanoa ona o se tasi lea o aiaiga o le faaiuga a le kapeneta ina ua maea le suesuega a se Komisi suesue na filifilia e silasila i tuuaiga o le aumaia faanana o fana mai Amerika Samoa i luga o le vaaleoleo o le Nafanua.
Faaalia e se molimau o le tasi lea o vaega o le iuga a le kapeneta i fautuaga na avatu e le komisi suesue, a uma loa le tolu tausaga o le konekarate a le alii Komesina, susuga Papalii Lorenese Neru, ona muta ai lea o lana tautua.
O le Aso Faraile na tea nei na faamavae atu ai le Matagaluega i le faauluuluga ua maea lona taimi ma o le aso foi lea na faaulufale ma faafeiloai ai le Komesina ua tulai mai.
E tofia nei Lilomaiava Fou Taioalo o loo avea ma se tasi o Komesina lagolago, ae sa tele tausaga na auauna ai i isi vaega o le matagaluega e pei o le ofisa suesue.
O le solaaga a pagota e toa 41 talu ai nei mai le falepuipui i Tafaigata o ia sa na taitaia se gaioiga a leoleo na toe mafai ona pueina uma ai pagota ma toe faafoi i Tafaigata.
Sa ia taitaia foi se vaega o leoleo mai Samoa sa galulue i Liberia mo le tausia o le filemu.