Ua faifai tetele lava feteenaiga i totonu o le lotoifale o le Faalapotopotoga o le Koluse Mumu aoao a Samoa, talu mai lava le masina o Aukuso 2010 na amata ona mavaevae ai le maopoopoga o lea faalapotopotoga ua leva tausaga o auauna ma galue mo le lelei o tagata o le atunuu.
O le feteenaiga na aliali mai sa toe masuiga mālie ina ua lolo se taofi o le itu sa tetee i le Peresitene ma lana komiti faatonu i le faaaogāina o meatotino ma tupe mo galuega fesoasoani a le Koluse Mumu, ma faapea ona faaauau ai pea tofiga o loo iai i le taimi nei.
Peitai ua liliu le Peresitene ma nisi o lana komiti ma faaulu se tagi poo se su e $600,000 faasaga ia i latou na faia tuuaiga ua faaaogā sese tupe ma meatotino.
Ua liliu foi le Peresitene ma molitai i latou sa latou feteenai i le faamasinoga i lo latou lē usitaia o le poloaiga a le faamasinoga na faia i le amataga o Setema, ina ia taofi ma tuu le latou fono faapitoa na usuia lea sa taunuu lava ma filifilia ai se laulau fou e pulea lē tumau le Koluse Mumu.
O le Aso Lua o le vaiaso nei 26 Oketopa 2010, e toe valaau ai lea mataupu.
O le vaiaso na tea nei na amata fofogaina ai le lē usitaia o le poloaiga, ae ua toe tolopo mai i le vaiaso nei se‘i ave se tali tusitusia a i latou o loo molia, e aofia ai Faleao Maka Sapolu, Vaasilifiti Moelagi Jackson ma Jerry Brunt, o le loia sa avea ma faufautua faaletulafono mo le taloina o le fonotaga faapitoa na afua ai le poloaiga a le faamasinoga.
Ua talia e le faamasinoga le talosaga a le loia a i latou o loo molia i le lē usitaia o le poloaiga, ina ia faataatia ese le poloaiga a le faamasinoga (set aside) ae se‘i suesue le isi vaega o le latou mau e agai i le faia o le fonotaga faapitoa e tusa ai ma aiaiga o le faavae o le faalapotopotoga le validity issue. O loo finau mai le itu tagi, le itu lea a le Peresitene o Muagututagata e lei tusa ai ma le faavae le fono na taloina ma faataunuu.
Pe afai e manuia le finauga lea a le itu o loo molia, o lona uiga e ono faaleaogā ai le poloaiga ae faaaogā loa tofiga na filifilia i le fono faapitoa e tauaveina le pulea o le Koluse Mumu, ae faatali i le fono faaletausaga e toe sailia ma filifilia ai se laulau fou.
Ae afai e faiaina lea finauga o lona uiga o le a tumau lava le laulau o iai ma le malosi o le poloaiga.
E lei mae‘a le suesuega o loo feagai ma se komiti filifilia, o loo silasila i le faaaogāina o tupe ma meatotino a le Koluse Mumu. E faato‘ā taloina le fono faaletausaga lea ua tolopo seia iai se aso, pe a mae‘a lea suesuega.
O le su e silia i le ‘afa miliona tala, e lei faamautuina se aso e fofogaina ai i le Faamasinoga Maualuga.
