Ole nofo fale aemaise i tuaa matutua ole isi lea vaega ole faatupu mai i atunuu i fafo. Ose tulaga ua vave ai foi ona matutua nisi ona ole nofo saisaitia e leai se isi e talanoa iai. Peitai ua avea nei le Walking Samoans ma avanoa ua mafuta ai Samoa i lea pitonuu ma lea pitonuu mo le soifua maloloina ae ua maua ai faigauo ma mafutaga e feiloai ma faasoa ai i isi Samoa.
Faaalia e Teleiai Edwin Puni ose tasi o Faatonu ole Walking Samoans, “Ose mea fiafia e tulimatai ele toatele aemaise ile aumatutua le aso ole savali auā ole a mafuta ma feiloai ai. Ole ala lea ole lua o aso savali o nisi pitonuu e le gata ile maua ai ole faamalositino ae ole a vave ai ona toe mafuta.”
Ole vaiaso na tea nei ua toe amatalia uma ai savali a kalapu e sefulufā ua iai nei. E sefululua kalapu i Aukilani, tasi Palmerston North ma le kalapu i Porirua. Fetalai Sooalo Setu Mua ole isi o Faatonu ole Walking Samoans, “E tatala le avanoa i soo se Samoa e auai ise kalapu savali e latalata ane ma e leai se totogi ole auai.”
Kalapu Eseese
Ole kalapu a Mangere Bridge oloo taitaia e Lilia ma Toatolu e savavali i Aso Gafua 10am ma Aso Faraile 10am ile Kiwi Espalande. Ole kalapu a Clendon oloo taitaia e Tutagailevao ma Potofou Taulia e savavali i Aso Gafua 10am ma Aso Lulu 10am e feiloai ile Clendon Library.
Ole kalapu a Mangere oloo taitaia e Leaupepe Pili ma Loli Mesepa e savavali ile Aso Lua Tuesdays 10am e feiloai ile faleaau a Mangere. Ole kalapu a North Shore oloo taitaia e Asuao Emi ma Malaesa e savavali i Aso Lua 6:30pm ile Sherperd’s Park i Beach Haven.
Ole kalapu a Tamaki oloo taitaia e Sialaoa Sefo ma Patosina Winterstein e savavali i Aso Lulu 10am e feiloai ile Panmure Community Hall. Ole kalapu a Palmerston North oloo taitaia e Florence Malama ma Tasi Tauli e savavali i Aso Lulu 6pm feiloai ile Espalande Railway Station.
Ole kalapu a Otara oloo taitaia e faafeagaiga ia Faasau ma Faanana Toilolo e savavali i Aso Tofi 10am e feiloai ile Otara Library. Ole kalapu a Henderson oloo taitaia e Niko Lalofau ma Vaotuua Latu e savavali i Aso Tofi 6:30pm ma Aso Sa 7am i Parrs Park.
Ole kalapu a Manukau oloo taitaia e Tavai Menu ma Tui Eddie Taualapini e savavali i Aso Faraile 11:30am e feiloai ile Radio Samoa. Ole kalapu a Manurewa oloo taitaia e Amosa Kennar ma James e savavali i Aso Faraile 10am e feiloai i Maich Road.
Ole kalapu a Avondale oloo taitaia e Titiula Tuigamala ma Savea Al Harrington Lavea e savavali i Aso Faraile 9am ma Aso Toanai 9am e feiloai ile Spider. Ole kalapu a Porirua oloo taitaia e Siaosi Anamani ma Martin Mariota e savavali i Aso Toanai 8am ile Aotea Lagoon.
Mo nisi faamatalaga ile Walking Samoans poo nisi pitonuu e fia amata sa latou kalapu savali, e mafai ona faafesootai Sooalo Setu Mua 021 024 16982 poo Teleiai Edwin Puni 021 618 042.
