E ova ma le 50 le aofai o tama ma teine, alii ma tamaitai aau na faailogaina le aso faapitoa o Niu Sila, le Waitangi Day i Taumeasina. Ole alii laitiiti e 7 tausaga le matua ae ole tagata sili ona matua e 70 tausaga.
Ae ole alii 15 tausaga mai le Kalapu ole Tanifa ole Vai, Sitivi Sooa‘emalelagi na manumalo ile aau mamao mai Taumeasina i Vaiala toe tini i Taumeasina.
Na toatele foi le ‘au aau mai le afioaga o Saoluafata na auai faatasi ai ma tagata eseese mai atunuu i fafo i totonu o Apia na auai ile aso faapitoa e faamanatu ai le Waitangi Day a Niu Sila.
Na fai lava si aave ole āva i gataifale o Taumeasina ma Vaiala, ole faigata foi lea ole feausiga ale Samoa Events.
Peitai, ole aogā tele lea o polokalame aau i Samoa, e ui ina faigata, ae na taunuu uma lava ile tini i latou sa tausinio.
Na auai i taaloga le sui Komesina o Niu Sila, Mike Walsh, sa ia tauaaoina le tele o faailoga mo le ‘au aau. Ile mae‘a ai, na fai ai loa ma faaaloaloga ale faletalimalo, e ala ile Haka faa-Maori na faatino e tama faigaluega ole faletalimalo.
Na sosoo ai ma le taumafataga ole Hangi na saunia faapitoa mo le aso o Niu Sila.
Faaiuga o Taaloga Muamua
2.2km Alii ma Tamaitai
Sitivi Sooa‘emalelagi (15 tausaga) Alii, Maree Hopley (64 tausaga)
Tamaitai 1.2km
Andrea Schuster (15 tausaga) Tanifa o le Vai, Palasi Liva (Saoluafata, 19 tausaga)
250m
Urlin Mulitalo (10 tausaga, Tanifa o le Vai), Tofu Sooa‘emalelagi (10 tausaga, Vailele)
Toe foi Tueffy Tuigamala ile Malo
Ole Aso Toonai na toe foi ai Tuigamala i tamoega tauva, ma manumalo ai o ia ile 10km i Apia. E ui e lei fiafia le alii faiaoga i lana taimi 41 minute 10 sekone, ae ose taumafaiga amata lea.
O Tuigamala o ia lea oloo umia lea matati‘a ole Malafoni a Samoa ile Lalolagi atoa, taimi 3 itula 12 minute. Na ia maua lea taimi ile Malafoni i Aukilani ile tausaga 2013.
O lona faamoemoe foi lea e toe foi e toe tauva i Aukilani, auala lea i tamoega ale Samoa Events.
E iai le malafoni a Savaii aso 8 Aperila, sosoo ai ma le ‘afa malafoni ale Tutoatasi i Apia, ma le malafoni a Aleipata i Lalomanu ile masina o Iulai. Ole mataina o lenei tuuga ole a auai le Komesina Aoao a Ausetalia, le tamaitai o Sue Langford, o ia lea na manumalo ile tuuga a tamaitai ile 6 kilomita (km).
E tolu tuuga mamao ale Samoa Events e tapena ai mo Savaii. Ole tuuga ole a sosoo ai ole Aso Toonai nei, ole tuuga lea i Safata e 12km, 7km ma 4km le mamao.
Faaiuga ole Apia Harbour 10km
Tueffy Tuigamala (35 tausaga) 41m 10 sekone, Kat Riley (33 tausaga) 1 itula 4 minute
6km Phill Voss (54 tausaga) 32 minute 35 sekone, Sue Langford (44 tausaga) 40 minute 44 sekone
4km Tofu Sooa‘emalelagi (10 tausaga) 22 minute 18 sekone, Sosefina Sooa‘emalelagi (19 tausaga) 29 minute 27 sekone
