“E faamanuia mai le Alii i e matata‘u ia te ia, o tagatānuu atoa ma alii.” E lē faailoga tagata le Atua, ae faailoga faatuatua, o afioga ia na tomatauina ai finagalo o le aiga aemaise le atalii ia Joe, i le sauniga puupuu o le faamanatuina o lona aso soifua i le Aso Sa na tea nei.
O le mae‘a ai o sauniga tapuai o le Sapati Paia, na potopoto faatasi ai nai ona aiga, uo ma paaga e siitia faatasi le viiga ma le faamanū ona o tausaga e tele ua aulia e le atalii, e pei ona masani ai i aso soifua faapenei. Na mae‘a le sauniga ma timaiga, sosoo ma le taumafataga a o faasolo faafiafiaga a nai ona uso ma tuafāfine aemaise o tausoga, faagasolo ai lea o molimau ma saunoaga faamanuia mo lona lumanai ma lufilufi ai ma le keke o lona aso faapitoa.
Na molimauina le alofagia o lenei atalii, ona o lona ola aogā i le Ekalesia lana autalavou aemaise o lona aiga. Ia alofagia e le silisiliese oe ma lou lumanai Joe. Alofaaga mai ou mātua pele o Victor ma Uluiva Sio, si ou tuafafine e toatasi o Lili, Tim ma Genesis, John, Victor, ma ou aiga uma ma uo i Melepone.
