Vevesi pea nisi Aso Fitu i le suiga o le Aso Sapati

O loo faaauau ona vaaia feeseeseaiga i le va o Aulotu o le Ekalesia Aso Fitu i Samoa nei ona o le fesuaiga o aso lea ua lua tausaga talu ona faamamalu.
O lenei suiga ua vaaia ai le vaeluaina o le Ekalesia Aso Fitu e pei ona faamamalu ai e nisi o le Ekalesia le Aso Toonai o le aso tapuai ae o le isi vaega e pei o le Misiona lea ua agai lava e faamamalu le Aso Sa auā a latou tapuaiga.

E tele feeseeseaiga ma finauga o loo tulai mai pea i lenei mataupu ma e lei mamao atu foi i le vaiaso ua tuanai na tulai mai ai se isi feeseeseaiga, o le taimi lenei i le va o sui o le aulotu o le Ekalesia Aso Fitu i Lotoso‘a i Saleimoa.

Faaalia ai le agai atu o sui o le aiga na o latou lisi lo latou fanua i le ekalesia i lea afioaga, a o tapuai i le Aso Toonai i le faamamaluga o le Aso Fitu e pei ona sa sau ai le Ekalesia.

O lea la ua sui le aso tapua’i a le aulotu lea ona o loo fesootai ma le Aso Fitu Misiona ma faapaia ai loa e i latou le Aso Sa e pei ona iai le suiga i lea vaega o le tapuaiga.

O le aiga e ana le fanua, o loo faaauau lava ona o latou tapuai i le Aso Toonai. O le lisi o le fanua o le aiga sa iai le manatu o le aiga ua mae‘a ma ua tatau nei ona agai ese le aulotu lenei ua tapuai i le Aso Sa mai i fanua.
Peitai o lea na ta‘ua e le faafeagaiga o le aulotu lea i Lotoso‘a o loo iai pepa o le lisi e lei mae‘a le taimi na tuuina mai e faafou ai le lisi auā le faaauau o le lotu i lea itu o le atunuu.
Ua toe taatia nei la le mataupu seia manino le tulaga o iai le maliega lea e faaaogā lea nofoaga mo tapuaiga.