Vevesi le faatau a le aulotu i le osiga feagaiga

O le osiga feagaiga a le Ekalesia EFKS Orakei ma le latou faifeau fou ia Rev Patini Perkins ma le faletua ia Olataga, na tulai mai ai se vevesi i le faiga faatau a le aulotu EFKS i Panmure i le Aso Lulu 27 o Ianuari.

O lea osiga feagaiga sa auai uma susuga i faafeagaiga ma o latou faletua o le matagaluega a Aukilani faapea toeaiina penisione malolo e molimauina lea faamoemoe i le hall a le Ekalesia EFKS i Panmure.

O le taimi o faaaloaloga na tulai ai le tootoo o Palauli e fai ma fofoga o le Ekalesia i Orakei e momoli le agaga faafetai i le paia o le auvalaaulia faapea susuga i faafeagaiga e tusa ai ma le auai atu i le faamoemoe ua maualuga ai le aso faatasi ai ma meaalofa na saunia mo le matagaluega.

O le ekalesia EFKS ua iai ona faavae ua uma ona taotooto e faapea, a tauaofia le matagaluega ae tutupu ai ni mea faapea, o le osiga feagaiga poo le tatala o le feagaiga, ona leai lea o se faatau, ae lafo sa‘o le lauga i le tiakono toeaina o le Matagaluega e na te faia se upu e tali fuaitau ai i le tootoo o le aso, ae se‘i vaganā ni faaipoipoga poo ni aso fanau e patino i totonu o le aulotu, ona fai lea o le faatau i luga i tiakono ma matafale.

Ae peitai i lea aso, o le osiga feagaiga sa fai, ae ua lē mafai le matapeapea ma uiga masani e naunau ai isi i le lauga i taimi faapea, na lē fetaui ai le oso a se tasi o tulafale o le Ekalesia a Panmure ma laga le faatau ae o loo saofafai le matagluega.

Ua leai ai ma se āva i tagata matutua ma ua taumafai ai e tuu ese le faavae a le Ekalesia na faavae mai ai.

Na tau amata fetaliaiga a lenei tulafale ma se tasi foi o tootoo o lea aso, le tootoo o Leulumoega ae o le a lē auiliiliina uma i lenei lipoti lafoga na masua i lena aso ona o manumanuga i nisi o suafa tāua o nuu ma afioaga o le a faatasina i luga o le nusipepa.

Peitai na ta‘ua i se molimau faatuatuaina na faailoa maia lenei lipoti i le tusitala, ua lē finagalo e faailoa lona suafa, na tau faifai tetele lava le mataupu a le latou aulotu i lea aso, ma na ai lava ina oso faalava atu le isi tamā matua o le aulotu ma faasagasaga loa lana mataupu i le tulafale matapeapea na amata ai le vevesi, ma iu ai loa ina lolo le tulafale e lafo le lauga i le tamā matua o le aulotu.

Ta‘ua i le lipoti na iu ina lē toe taofiofia ai ma le isi foi aoao fesoasoani matua o le Ekalesia, o se tasi o tamā e tele ina faasoa i luga o le polokalame o faasoa a le Radio Samoa, ma ia toe aoaia ai le lē mafaufau o lea tulafale.

O le itu e faanoanoa ai lenei mataupu, ona o le maitau a i latou na iai i lea aso, e foliga o le faapogai autu lava o le finagalo faauliulito o lenei tulafale e na te fia faia le lauga, ona o mea lava e maua mai ai foi e pei ona masani ai le aganuu a Samoa, ae ua matuā solipala ai i lalo le faavae ua mautu ona faataatia a le Ekalesia i mea ma aso faapenei.

O se tasi o matai o le Ekalesia EFKS i Panmure na tulai ma faapa‘i mālū i le latou aulotu e malilie e malolo le aulotu ae lafo le lauga i le tiakono toeaina o le Matagaluega ia Fuimaono e faia se upu faafetai e talifuaitau ai i le tootoo o Palauli ma le Ekalesia EFKS i Orakei e tusa ai ma le faaaloalo.

O le saunoaga a le susuga i le toeaina o le Pulega ia Rev Pouniu Faamausili, na ia saunoa ai i le lagona o lona maasiasi i le mea ua tulai mai i totonu o lana aulotu, mea lea e leaga ai le lē fainuu, e feoai feoai i Samoa ae lē osi nuu ona omai lea iinei taitai seseina tagata.

O le molimau foi a se tasi o matai o le Ekalesia, e lē o fia faailoa lona suafa, o le tulafale lea, e tele isi ona suafa matai eseese e faaaogā e tulai ai ma faalealea i ni tauaofiaga e auai atu ai, ae o loo faamaonia e lē o matai ai i na suafa.

O le susuga i le faafeagaiga ia Rev Patini Perkins ma le faletua ia Olataga sa galulue muamua i le EFKS Panmure i le toeaina ia Rev Pouniu Faamausili a o lei tofia e vaaia le tovine i Orakei.

O lea ua valaauina nei mo le galuega fou, faatasi ai ma matafale e tolu o le aulotu ua amata ai le galuega. E toaitiiti le aulotu ae na iloga le maoae o tapenapena ma faaaloaloga na maau i ai mo le matagaluega. E laitiiti ae maini.