Ua lua vaiaso o vāea nisi o le aufaigaluega kamuta a Samoa o loo galulue i le fausia o le faletalimalo a Aggie Grey’s i Vaisigano. O le faamatalaga ua oo mai e lē faamaoni, e pepelo taimi o loo saini i lalo ma le galue o loo vaaia ma ua iai meafaigaluega ua gaoia mai i le nofoaga o le faletalimalo ua faapea ona galulue ai.
O le faitioga a tagata faigaluega, ua lē totogia a latou NPF ma ua tele o latou taimi ua toesea ae e lē faamaonia tuua‘iga ua faia.
Ua umi se taimi o tulai mai faafitauli i le va o le konekarate Saina o loo fausia le faletalimalo ma nisi o tagata o loo galulue faakamuta i lea galuega tele.
Ua oo i le faamasinoga nisi o mataupu i le faaoolima o tagata faigaluega Samoa i tagata Saina o loo faia totogi ona o mafuaaga e pei ona ta‘ua.
E ui o lea ua iai ma se isi konekarate o papalagi o loo galulue ma Saina ua tulai mai ai foi feeseeseaiga i le va lava o konekarate nei e lua ma o le vaiaso lenei ua savali ese ai nisi o le aufaigaluega Saina mai i lea nofoaga.
Na tapa se faamatalaga mai i papalagi na taunuu atu o iai i le lotoā i Vaisigano ae sau le tali se‘i talanoa muamua ia latou loia ona mafai lea ona fai mai se faamatalaga aloaia o le feeseeseaiga o loo tulai mai.
O le tali a le konekarate Saina, e toatele ua vāea ae e lē o toe saili foi i latou i ni tagata Samoa e sui ai i latou ua vāea. O le vaiaso fou foi e alu ai le isi vāea o tagata faigaluega Samoa lava ia.
O le mataupu i le konekarate fesoasoani lea e sosoo lava ofisa i le lotoā i Vaisigano, e lē o fia talanoa mai se tasi i tusitala e faatatau i nei mataupu se‘i vaganā ai le faamatalaga e telē le aafiaga o le galuega ona o feeseeseaiga nei e tulai mai i totonu o le lotoā.
O le masina o Iulai o le tausaga na tea nei lea na tatau ona mae‘a ai lenei galuega ma o le taimi lenei ua fesootai le Sheraton Group ma le Aggie Grey’s ina ia unai le fausia o lenei faletalimalo tele ma ia vave mae‘a peitai o lea faatoa vaaia le gaioi ma le agai ane i luga o le galuega ae o lea foi ua vaaia lava le toaitiiti o i latou ua galulue i lea nofoaga.
E lei tali mai le pulega o Aggie Greys i taumafaiga ina ia faamatala mai poo le ā tonu lava le mea ua tupu i le galuega ae sa iai tagata faigaluega Samoa ma papalagi i le lotoā i le taunuu atu ai mo se tatou lipoti. E na o le toatasi lava le tagata faigaluega Saina sa i fafo mai o le ofisa o le Qingdao Construction.
O le tali a le konekarate Saina i NPF o tagata o loo faitio ai, o loo totogi NPF i le taimi faatulagaina e tatau ona totogi ai, ma o taimi faigaluega, ua iai nei se auala e faamaonia ai le galulue i le taimi atoa o loo saini mai o nei tagata faigaluega.
E to‘a 200 tagata faigaluega Samoa na maua avanoa e galulue ai i lenei nofoaga ae o lea ua kuata ua ta‘ua ua vāea ma le isi lisi e faamautu i le vaiaso fou.
