Ua silia nei i le sefulu tausaga o faagasolo pea tauvaga lauga a fanau aoga i totonu o aoga tulagalua i totonu o Aukilani. O lenei polokalame o loo faasolosolo lava i aoga taitasi i tausaga uma.
O le faamoemoe autu o lenei polokalame o le taumafai lava ia putiputi ma faatāua Measina a le atunuu ia aua ne‘i galo pe mou atu. E ui lava ina tatou nonofo i atunuu ese ae lē mafai lava ona aveesea ai le faavae na saili malo ai tuaa ua mavae, ma o le manulauti foi lea o loo tauave e mātua mo fanau.
O le Aso Lulu 10 o Setema i le taeao na toe faataunuuina ai lenei tauvaga tele i le hall a le aoga tulagalua a Sir Edmund Hillary Collegiate Middle Scholol i Otara. E 15 aoga na tauva ai, ma o le vasega 7 & 8 na autu i ai lenei faamoemoe, poo tamaiti i le 11 tausaga agai luga i le 13 tausaga.
O faiaoga mai aoga taitasi sa auai e tapuaia a latou sui tauva, faapea foi ma matua na agai atu e molimau taumafaiga a alo ma fanau. O le aoga a Sir Edmund Hillary Collegiate Middle School na latou polokalameina lenei tauvaga lauga i lenei tausaga ma o le taimi muamua foi lea ua latou tuufaatasia ai lenei faamoemoe.
O le fofoga o le aso o le susuga i le faiaoga ia Stephen Laban, ma o ia foi sa faafeiloaia le mamalu o le atunuu na autovaa atu. O afioga i faamasino, o le faletua ia Taulapapa Tumua o se tasi o tina sa galue faafaiaoga i Samoa, Amerika Samoa, ma Niu Sila nei i le tele o tausaga, o ia sa fai ma sui o faamasino e faatulima i fanau tauva aemaise o Samoa potopoto ma le tapuaiga, faatasi ai ma le isi faamasino le susuga ia Ioane Vine.
O le faagasologa o le pookalame, na faia le Se‘i mo i latou sa tauva, ma tatala ai e le tamaitai ia Lonisha Saeni mai le aoga a Robertson Rd le tauvaga. E leai se autu filifilia na faaautu i ai manatu o sui taitasi, na filifili lava e le failauga latou le ulutala e faatatau i ai lana lauga.
E ono vaega sa togi agai i ai le tauvaga (1) Faalauiloaina o lau lauga (2) Kilivaina o le lauga (3) Feau o le lauga (4) Gagana (5) Auala e momoli ai le lauga i faamasino (6) Umi o le lauga.
Sa lē toe iai se pisa ina ua amata taumafaiga a sui taitasi a aoga ae na o le sioa ma faalologo i feau ma le logologo puialii a fanau. Na fai le malologa puupuu ina ua mae‘a lauga ae galulue faamasino e faamaopopo le iuga ua oo i ai le tauvaga.
Iuga o le Tauvaga
O le alii o Toma Foroti mai le aoga a Finlayson Park School na sola ma le tulaga muamua, (2) Victoria Soti mai le aoga a Mangere Central School ma le (3) na maua lea e Jonah Palota Kopa o le aoga a Pasadena Intermediate, sa maua uma foi tusipasi o failauga taitasi sa auai.
O le fofoga o le aso ia Stephen Laban na toe momolia le agaga faafetai i mātua ma aoga taitasi sa auai atu o latou sui, ma faaiu ai loa i se taumafataga māmā na saunia lava e faiaoga ma mātua faapea fanau o le aoga a Sir Edmund Hillary Collegiate Middle School.
