O le tofa Fao Ualesi o le Tuua lea o le afioaga o Asau i le Paia o Aiga ma Salafai sa tuliloaina e le loia a le afioga Vaai Papu Vailupe, le afioga Leota Raymond Schuster, i le faamaoni o lana molimau sa tuuina atu i le faamasinoga o loo suesue ai tuuaiga o faatosina solitulafono faasaga i le faipule o Vaisigano Numera 1 o le taitai foi o le Itu Agai ma le vaega faaupufai o le Tautua Samoa.
O le faateaina o se tasi o tamalii o Asau ma lona aiga le afioga Masoe Selota, o se isi lea o vaega sa tuliloa ai Fao e le loia a le itu tetee, i le mafuaaga o lea finagalo o Alii ma Faipule, ona o loo iai molimau na mafua ona faia lea faaiuga ona sa lagolagoina e Masoe Selota le afioga Vaai Papu, ae lē o le sui tauva sa lagolago e Asau le susuga Tufuga Gafoaleata Faitua.
Na tautino le molimau e leai se faaiuga a le nuu e faatulai lea tamalii ma lona aiga, ae o saunoaga a Masoe Selota na alu i faasalalauga a leitio ma nusipepa i Samoa ma atunuu i fafo, na ta‘ua ai ua faatea o ia, ae o loo nofo pea i le nuu.
O le mafuaaga tonu lea e pei ona faaalia e Fao na fono ai loa le nuu i Alii ma Faipule ma faia le faaiuga e tu loa le Tootoo e faatulai ese lea tamalii ma lona aiga.
O le vaega lea o lana molimau na ia faailoa ai foi, e lei mafua le faaiuga ona e faapea ua palota ese Masoe Selota ona sa tuu saoloto tagata o le afioaga e faatino le latou aiā tatau e filifili ai i se sui e lagolagoina e avea ma tofi o le itumalo.
Na faamatala foi Fao Ualesi i lana molimau, o le taeao sesegi o le Aso Sa, 27 o Mati 2011 na logoina ai o ia e lona tausi (toalua) o tagata o loo pulolou i le ietoga i luma o lona fale i Asau.
Na ia alu ane i ai ma susue ma ia iloa ai o le afioga Vaai Papu ma lona tuafafine o Soi le faletua o Masoe Selota.
O Masoe o loo molimau e lagolago le itu a le afioga i le faipule ma e lei fofogaina lana molimau.
Na faaulufale e Fao le ifoga ona faapea atu lea o Vaai e faamagalo atu ia ona ua sese. O a foi ni tala ua masua i luga o faasalalauga ia finagalo malie Fao e faamagalo sona aleu.
O le talitonuga o le Tuua o le saunoaga a Vaai e faasino i faasalalauga na saunoa ai Masoe i luga o leitio ma faailoa le faateaina o ia ona e mafua i le palota.
Na fautuaina e Fao, Vaai e lē o ia e maua ai se tali o lana ifoga, ae o le a ia logo le nuu mo so latou finagalo.
O le aso muamua o lana molimau na ia faailoa ai i le faamasinoga le oo atu o Vaai Papu i se tasi o aso a o lei faia le palota. O le la feiloaiga lea ma le Aloalii na lafo ai se manaoga o Vaai e avea o ia (Fao Ualesi) ma fofoga o le vaega faaupufai o le Tautua i Salafai, i le faamoemoe o le Tautua Samoa e savalia itumalo uma mo le faalauiloaina o a latou sui tauva.
Sa avatu ai se tupe e $500 ma se fagu faamalosi o le ituaiga o le uisiki (Whiskey).
E lei talia e Fao le manao o Vaai ae sa ia taofi le fagu uisiki ma le tupe. Na fesili le loia a le itu tetee poo ia te ia pea le lima selau tala ae na tali Fao o loo ia te ia lava le seleni. Na toe fesili le loia o Leota Raymond Schuster, pe sa ia teuina pea ona o lona faamoemoe e ave i le faamasinoga ae tali le molimau o le mafuaaga tonu lea.
O taumafa na faia i le aso o le palota na faaalia e Fao, na faato‘ā tufa lava ma tausasami ai le tapuaiga ma le nuu ina ua mae‘a le palota.
E fitu molimau a le itu tagi ma e oo mai i le Aso Tofi, ua amata ona fofoga le molimau lona tolu, o le tausi o Fao Ualesi.
O loo faaauauina pea le suesueina o molimau a itu e lua i lenei faamasinoga tau palota na amata fofogaina i le Aso Lua, 12 o Aperila 2011.
