Ua molimauina ua faitau masina ma vaiaso ona faia lea o le isi faigapalota tele a le atunuu, ma e lē o toe faatafatafa vaega faaupufai i le tauai mai o mataupu e fai ma mau e lagolago ai a latou taumafaiga o faatosina faapolokiki.
O tuua‘iga a le Tautua Samoa i le faaaogā e le HRPP ma lana faigamalo o polokalame o le atinae o le atunuu e momono ai i totonu ma faatosina e saili ai le lagolago a tagata palota ua lē nofonofo ai le Malo i le tau‘ai mai foi ‘oa latou tali e teena ai tuua‘iga.
O lea sa lipotia i le lomiga o le tatou nusipepa i le vaiaso ua mavae le mau a le Tautua Samoa ina ua amata a latou feiloaiga ma tusitala seia oo lava i le taimi o le a faatino ai le faigapalota.
O le vaiaso na tea nei na sosofa ai e le HRPP tuua‘iga a le Tautua Samoa e pei ona avea le tauaofiaga a le Palemene na usuia i le Aso Lua ua mavae 17 o Novema e faamalamalama ai se finagalo o le fofoga fetalai i se tasi o tuua‘iga ua aafia ai lona tulaga o le fofoga o le fono aemaise o ia o le taitaifono o le komiti faapalemene mo le soifua maloloina.
Na faaalia e le taitai o le Tautua Samoa i tuua‘iga o le nuu o Sasina o se tasi o afioaga (Sasina) o le itumalo o le fofoga fetalai sa faia ai le tatalaga o le polokalame a le soifua maloloina ma o se isi lea o faatosina e lē faatagaina i le tulafono o faigapalota.
Na amata lava taualumaga a le Palemene i le faasilasilaga mai le fofoga fetalai ma ia faamalamalama ai e faapea e lē o sana faaiuga na ave ai le polokalame i Sasina ae o le faaiuga a le Matagaluega o le Soifua Maloloina. O se faaiuga foi na ia ta‘ua na malilie uma i ai le komiti faapalemene o loo iai i totonu ma le taitai o le Itu Agai.
O le finagalo o le fofoga o le fono i le mataupu sa molimauina ua sa‘i ai sona finagalo i le taitai o le Itu Agai ma ia talia ai ni faauilavea mai le Palemia, o le Minisita o Tina ma Tamaitai, Minisita o le Soifua Maloloina ma le minisita lagolago se tasi o faipule o Faasaleleaga Numera Tasi e faamalamalama ma tali atu ai i tuua‘iga a le Itu Agai.
Na fiu Palusalue Faapo II e tulai ane e fia maua se avanoa e faasa‘o ai nisi o saunoaga mai le Malo agai i le mataupu peitai e faatolu ona faatonuina e le fofoga o le fono e nofo i lalo, ae o le a iai le taimi e tulai ai e fai lana faatoesega.
Ina ua maua lea avanoa sa leai se faatoesega a Palusalue ae na o le faamalamalama atili o lana mau ma ia faia ai se lafoga i le fofoga o le fono e aveese lona suafa mai le komiti faapalemene o le soifua maloloina.
E lei tali i ai le fofoga fetalai. E lei umi se taimi na tuu ai le avanoa i le taitai o le Itu Agai, ae faia le faaiuga a le nofoa e talia le faatoesega na faia e le Minisita o Galuega o se isi faipule o nofoa e lua o le itumalo Safata e avea ai ma sui o Palusalue Faapo II.
Na faauilavea Palusalue i le faatoesega a lona uso a faipule ma ia faailoa i le Palemene e lē maua ai ni palota a le afioga Manu‘alesagalala i le faatoesega ua faia fua mo ia. Na faamuta felafolafoaiga i le mataupu ae sa lē tuuina atu e le fofoga fetalai se avanoa i le tulai ane a le sui taitai o le Itu Agai e fia maua sona avanoa e saunoa ai i le mataupu.
I le feiloaiga a tusitala ma le Tautua Samoa ina ua mae‘a le fono a le Palemene na tuusa‘o ai se fesili i le taitai le afioga Palusalue, poo lea ua faaaogā e le Malo tuua‘iga na latou faia e saili ai ni ‘ai o le HRPP i le faafofoga a le atunuu ina ua avatu le mataupu e le fofoga fetalai i le Palemene.
“O lena tonu e sa‘o lelei lau fesili, ona o le mea lea na iai ua iloa atu le ita o le fofoga fetalai i le matou mau. O le isi tulaga sa lē tatau ona faia e ia le mataupu ona o loo aafia ai”.
