“Ua palaai le Palemia o Samoa”… Campbell

“O Campbell o se tagata pepelo”… Tuilaepa


Ua lalau e le alii tusitala mai Niu Sila o John Campbell o le faletelevise o le TV3 i Aotearoa, le palaai o le Palemia o Samoa ina ua lē taunuu le la feiloaiga e faapea sa faamautu i se fesootaiga i luga o upega tafailagi e ala i le imeli. O le Aso Lulu, 27 o Oketopa 2010 i le 11 i le taeao na faatulaga e faia ai lea feiloaiga mo se faatalatalanoaga poo se interview.

Peitai na vaaia le lē fiafia o le alii tusitala a o fesiligia e se vaega o tusitala i Samoa i le afiafi o le Aso Lulu na tea nei na tuu e faia ai le faatalatalanoaga, ona ua toe faapafala lea feiloaiga ona ua tele tuatuagia o le taitai o le Malo.

Na afea le faletalimalo o le Millenia i Sogi e Campbell ma lana aumalaga a o faia ai se faatasiga a tusitala o le Pasefika ma tusitala i Samoa lea na tatala aloaia e le alii Palemia i le afiafi ua tea le 6pm i le afiafi.

E taunuu Campbell ua inu le avamalosi ma fai si meaai māmā a tusitala ma malo vala’aulia sa faatasi ai i le sauniga, ae ua tuumuli le Palemia mo nisi o tuatuagia.

E lei faatali le alii i lona tali ane i fesili a tusitala ma ia faaalia ai lona tutumau pea i lana lipoti e selau miliona tupe o fesoasoani o le sunami na aumai mo Samoa ua leiloa poo fea ua faaaogā i ai. Na ia faaalia ai foi, o lona malaga mai i Samoa ona ua faamautu lona avanoa e fesiligia ai le Palemia.

Ae ua lagona lona faanoanoa ua lē tausisia e le Palemia feutanaiga.

O le po lava lea na agai ai le alii ma lana aumalaga faatasi ma ni tamaitai tusitala matutua i Samoa e aofia ai ma se matai sa galue foi faatusitala i le tele o tausaga ua mavae le tofa Tupai Molesi Tauma‘oe, e saili se nofoaga o iai le alii Palemia.

Fai mai se molimau na maua le Palemia poo ua tea le 11 i le po lava lea, ae peitai sa lē avanoa le taitai o le Malo e tali i fesili a le alii o Campbell.

O le feiloaiga foi na faia ai ma le tuugatala e faato‘ā feiloai i le vaiaso nei i le Aso Tofi, 4 o Novema.

I se lipoti i le faaiuga o le vaiaso faato‘ā mavae atu nei, o loo faaalia ai e Campbell ua palaai le Palemia ma lona lē tausisia o le feutanaiga mo se faatalanoaga.

Ua ia faaalia ai foi sa tatau ia Tuilaepa ona ia faaaogā le avanoa auā o lea ua maua le avanoa e faailoa ai lona finagalo i ni vaega ua lē sa‘o o lana lipoti.

I se finagalo o Tuilaepa e tusa ai ma lea tulaga na ia faaalia ai, o Campbell o se tagata pepelo, ma o le aso 4 o le a feiloai ai, o se aso na faailoa atu e Campbell la te faafesagai ai mo le faia o le talanoaga.

Ua faailoa ai foi e Tuilaepa o le a malaga ma Campbell i nuu ma afioaga ua mae‘a ona faia ai galuega fesoasoani ina ia faasino tonu i ai galuega ua faatino.

Ua ia faailoa foi e ao i le faatonu o le nusipepa o le Samoa Observer, le susuga Mataafa Keni Lesa, sa ia faitioina foi le faatinoga o galuega fesoasoani a le Malo ona latou malaga faatasi.

Faaalia e Tuilaepa o le a pueina foi e faletelevise lea asiasiga ma faaali,  mo le silasila a le atunuu, ae pule foi Campbell ma lana aufaigaluega ia latou ata e faaali i Niu Sila, ae o le mea sili ua silasila le atunuu i ata moni o galuega fesoasoani ua faia e ala mai i le tautua a faletelevise i Samoa o le a latou malaga faatasi.

O le a tuli tatao pea e le Samoa Times lenei finauga ma le taunuuga tonu o le lipoti o galuega fesoasoani o le sunami ma seleni ua faaalu ai, lea ua mafua ai le ilitata o le Malo ia Campbell ma lana polokalame, sa faasalalau ai le selau miliona o tupe ua leiloloa poo fea ua galoma i ai.

Comments

comments