O le lipoti a le ofisa o le Suetusi sili a le Malo na tuuina atu i le Fofoga Fetalai o le Maota Fono o le Palemene le Afioga ia Toleafoa Faafisi i le aso 16 o Tesema 2016, na manino mai ai i le itulau e 11 (page 11) o lea lipoti se tasi o mataupu na faagasolo iai suesuega i le Matagaluega o le Soifua Maloloina.
O le aso 13 o Iuni 2014 na tuuina atu ai se pepa mo le totogiina o le seleni e $212,000.00 (payment vouchers), o lea seleni e faamoemoe e totogi atu i ni kamupani se lua (suppliers), o le isi supplier e $77,000.00 ae o le isi e $135,000.00. Ina ua taunuu atu lea pepa i le Matagaluega o Tupe na maua ai e le Matagaluega o Tupe se faiga taufaasese e ala lea i le faaseseina ai e le tamaitai ofisa mai i le Matagaluega o le Soifua Maloloina e fosi le saini a nisi o le komiti (Tenders Board) ina ia lagolago ai le totogi mai o lea seleni tele.
Na vave ona maua e le Matagaluega o Tupe lea faiga taufaasese ma faagasolo loa iai a latou suesuega i le aso 17 o Iuni 2014. Na faamaonia e le Matagaluega o Tupe ia faiga taufaasese ma tuuina atu ai loa lenei mataupu i le komisi e pulea tagata faigaluega a le Malo (Public Service Commission) faatasi ai ma le Matagaluega o Leoleo mo le faaauauina ai o suesuega. Na taua foi e le lipoti lenei a le Suetusi a le Malo le faamavae mai ai o lea tamaitai ofisa mai i le Matagaluega o le Soifua Maloloina i le aso 30 o Iuni o le 2014.
Na fautuaina malosi e le Matagaluega o Tupe a le atunuu le tatau lea ona iai ni faiga e mataitu ai galuega o faatino e tagata faigaluega a le Malo ina ia mautinoa o loo faatino i auala sa’o ma le amiotonu ma ia aua nei toe tulai mai nei faiga taufaasese i le lumanai.
I le lipoti lava lenei o loo maua ai foi se tasi o Masini Laptop na ave i tua i le aiga o se tasi o tagata faigaluega o le Matagaluega o le Va i Fafo (Foreign Affairs and Trde) mo le faaaogaina i galuega faaofisa i le aso 31 o Me 2014, peitai na lipotia le osofaia ai o le fale o lea tagata faigaluega i le faaiuga o le vaiaso i Ululoloa ma gaoia ai le laptop lenei e tusa lona tau ma le $1,479.
Na fautuaina e le Matagaluega o Tupe le tatau ona toe totogi uma e le tagata faigaluega lenei le tau atoa o lenei masini laptop, faatasi ai ma le fautuaga ina ia faatino le inisiua mo meatotino nei a le Malo.
O le aso 21 o Aperila 2015 na gaoia ai foi se pusa o matauila mai le Matagaluega o Siosiomaga ma le Punaoa Faalenatura ae na faatoa lipotia i le aso 27 o Aperila 2015. E leai se suesuega a le Matagaluega o Tupe na faia i lea vaega. Aso 20 o Novema 2014 na faaaoga sese ai e nisi o le Matagaluega o Leoleo se tupe a le Matagaluega e $190.00, na faatautaia ai suesuega i le aso 21 o Novema 2014 ma mautinoa ai le faaaogaina e le isi sui faigaluega o le $150 a’o le isi e $40, na toe tautino lava i laua nei i le la faaaogaina ai o lenei seleni.
Mulimuli ane toe totogi uma le seleni a le Matagaluega ae faamavae le isi toatasi ae tuuina atu le lapataiga mulimuli i le isi sui e toatasi. Fautuaina e le Matagaluega o Tupe le Matagaluega o Leoleo i le tatau lea ona faaaoga lelei tupe a le Malo i ni auala sa’o ma le amiotonu.
Aso 6 o Oketopa 2014 na aveesea mai ai se tasi o faata o le taavale a le Ofisa o Fuainumera Faamauina (side mirror) i le vaega o paka ai taavale a le Malo i le Eleele Fou, o le aso 16 o Oketopa na lipotia ai lea vaega ma faagasolo ai suesuega.
Na toe fautuaina le toe totogi ai e le ofisa o Fuainumera Faamauina o lea faata e tusa lona tau ma le $350, ae lapataia ai le vaega o gafa ma le leoleoina o aseta nei a le Malo i le tatau lea ona mataala i le faatinoina o a latou galuega aemaise i le taimi o le po.
O le a faaauau pea ona tuuina atu nisi o vaega e pei ona taua e lipoti a le Suetusi a le Malo e pei ona liki mai i le tatou nusipepa lipoti mai i le tausaga e 2012 e oo mai i le 2016.
