E ui i le laitiiti o ona motu, o se tasi lenei o fuafuaga tele ua feagai nei ma le Pulega o le Motu o Tokelau ua faalauiloa mai i Samoa.
O le fausia lea o sona malaevaalele. E lē o toe mamao foi la se taimi ae amata talanoaina femalagaiga i le ea i le va o Samoa ma ia motu laiti e tolu o lona tuaoi, ona o lea ua tāpā se fesoasoani a le Polynesian Air ina ia lauliliu ai se avanoa e ono feoai ai ona vaa laiti i le va o motu o Tokelau aemaise le va ma Samoa nei.
Faaalia i se lipoti mai i le Polynesian Air, e lua kamupani ua momoli atu talosaga ina ia talanoaina ma le kamupani vaalele a Samoa se faamoemoe faapea, ma o le a tālia se isi talanoaga a le Fono a Tokelau lava latou ina ia faamautu atili ai lea faamoemoe.
E pei ona lipotia muamua, ua mae‘a talanoaga na faia i Samoa nei o nisi o galuega tetele ua vaavaai ma o nisi ua amata nei ona faatino i Tokelau ma o se tasi lenei o galuega tele o le fausia lea o ni malaevaalele laiti i motu o le atu Tokelau auā le faafaigofie ai o femalagaiga i le va o motu aemaise le va ma Samoa, le tuaoi aupito latalata atu o Tokelau.
Faaalia i lipoti e le Minisita o Felauaiga a lea atunuu, o Foua Toloa, o le taimi lenei ua talanoa ma ua amata faatino galuega mo ni malaevaalele peitai o loo ave pea le faamuamua i le lumanai lata mai o Tokelau i femalagaiga i luga o Vasa.
E tasi le Vaa Laupasese o Tokelau o loo iai i le taimi nei, ae o loo totogi lava Vaa o Samoa e ala i le Faalapotopotoga o Vaa a le atunuu, ma o loo faaauau ai faigamalaga i le va o Motu e tolu o Tokelau ma le va ma Samoa, lea e taitasi i le vaiaso ona faatautaia ai femalagaiga i le va o nei atunuu.
O loo faapea foi ona faaaogā pea le Vaa a leoleo a Samoa le MV Nafanua pe a iai ni manaoga faatatope a nei motu e moomia ai le fesoasoani, ma o le tele o gasegase e moomia se fesoasoani i Samoa nei o loo aumai lava e le Nafanua pe a faanatinati le manaoga mo togafitiga.
O le manaoga o loo unaia ai se malaevaalele na lāgā e Niu Sila ona o le asiasi mai pea ma vaaia ai le vavamamao o atumotu, ma o loo taumafai lava fesootaiga e ala i vaa o le sami.
O Samoa la lea ua tapa mai i ai kamupani e lua ina ia saili ai se auaunaga tau vaalele. Faaalia e Foua Toloa o loo talanoaina pea femalagaiga e ala i vaalele ae o le a toe talanoa le Fono a Tokelau ma faamautu ai se manaoga faapea i le faaiuga o le tausaga nei.
O isi galuega tetele ua faatautaia nei i Tokelau e aofia ai ni faleaoga se tolu ma se falemai mo tagata o motu e tolu o Atafu, Nukunonu ma Fakaofo.
