Valu moliaga o le alii leoleo toso teine

O le afaina pea o le auaunaga ma le galuega lelei o loo feagai ma alii ma tamaitai leoleo poo le Malu o le Malo i aso uma, ona o faaletonu e tutupu ma aliali mai i nisi taimi e aafia ai nisi o le aufaigaluega, e le tuua ai le faia o le galuega i le molia o nisi e aafia i ni tuuaiga tau soligatulafono.
O le mau a se tasi o alii leoleo sinia, e le atoatoa le auaunaga a le vasega o le Malu o le Malo i nisi o taimi pe a iai ni faafitauli e tutupu ma aliali mai, ae ia manatua foi e le atunuu o leoleo e le o ni agelu. O nisi o saunoaga a le Minisita o le Matagaluega i nisi o mafutaga ma sauniga a le ofisa e na te faamamafaina ai pea le tāua o le auaunaga a alii ma tamaitai leoleo aua o latou o Malu o le Malo. Peitai e leai se isi e i luga a‘e o le tulafono pe a oo ina afaina i ni faaletonu e tuuaia ai.
O le alii o Faae‘e Te‘o (silasila i le ata) na molia e leoleo i le toso teine, taumafai e faamalosi se tamaitai mo se faigaaiga, ma le faaoo manua ina ua faaulu se tagi a se tina talavou (taofia le suafa) faasaga i le alii leoleo e galue i le vaega o le faaili (Police Band).
O le po o le Aso Faraile e pei ona taua e se molimau na agai atu ai le tamaitai na aafia i le ofisa o leoleo mo se fesoasoani, i se isi na te momoliina o ia i lo latou aiga, ona ua maea sana tafaoga i se falekalapu.
O lona faasuaava na mafua ai ona ia tapa i leoleo mo se fesoasoani, lea e faapea na fai loa i ai lē o loo molia la te o e momoli. O se vaega o Fagalii-Uta na oo i ai le momoliga o le tamaitai lea e faapea na faatino ai loa le soligatulafono.
E lei tuuina atu se tali a lē o loo molia i moliaga ina ua tulai i le Faamasinoga Maualuga i luma o le Faamasino Sili, Patu Tiavaasu‘e Falefatu Sapolu ona e lei maea suesuega a leoleo e faatoa faamautu ai moliaga.
Sa tuuina atu se talosaga a lana loia mo se avanoa e tatala ai i tua Faae‘e i ni aiaiga ma tuutuuga, peitai sa tetee i ai loia a le itu a leoleo e mafua ona e matuia moliaga, ma e tupu foi le soligatulafono o loo galue faaleoleo lē o loo molia.
E lei talia e le Faamasino Sili le talosaga e tatala i tua i ni aiaiga ma faatonuina ai le nofo taofia pea o Faae‘e Te‘o e faatali ai le isi valaauga o ona moliaga ile aso 18 o Ianuari o le tausaga fou 2010.