E lē o toe po le silafia a le atunuu i faaletonu na fetaiai ma le aulakapi a le Manu Samoa a o faagasolo le Ipu o le lalolagi i lona amataga.

O faaletonu na taualuga ai taaloga a le aulakapi a le atunuu i se tulaga e lei manuia lona faamoemoe i le fia saofai i totonu o quarterfinals ina ua malolo ia Aferika i Saute.

O ia foi faaletonu na saga mapuna a‘e ina ua mimilo lagona o le atunuu ma le tapuaiga a Samoa ina ua maua tala o le a lē foi i fanua le ‘au se‘i fai se fesagaiga ma le atunuu, ma ave i ai le faafetai ona e ui ina lē tau lau o le faamoemoe, ae na matuā faamalieina le tapuaiga i le tulaga maualuga na iai le taumafai o lana aulakapi.

“O le mea pito sili lena ona faanoanoa ai tama o le ‘au ona na lē oo loa i quarterfinals, fai mai loa e ta‘ape ma toe foi i konekarate”. O le manatu lea o se tasi o tusitala o taaloga  mai Samoa sa malaga faatasi ma le Manu Samoa i le Ipu o le lalolagi, le susuga Sioeli Alofaifo Taulealeausumai, ina ua fesiligia mo sana faamatalaga.

“E oo i lo tatou atunuu i Niu Sila sa matuā lagona le lē fiafia ina ua maua tala o le a ta‘ape le ‘au e aunoa ma se fuafuaga e foi i Samoa se‘i feiloai ma le atunuu”. O le mau a le alii tusitala o taaloga a le leitio Polenisia, o lana faaiuga e tusa ai ma le tulaga na aliali mai ua tatau ona suia atoa le pulega o galuega a le Iuni lakapi poo le Administration.

“O le tausaga e 2004 na amata ai ona lotolotoi i le lipotia o soo se taumafaiga a le tatou aulakapi, ma o le mea lava lea sa ou matauina o le lē lelei ona pulea gaioiga ma tonufai a le iuni e faasino i le tatou Manu Samoa…. Na matimati nei le faatalauula a le iuni i le atunuu mo le fia maua o se fesoasoani tupe auā tapenaga o le ‘au, ae na uma loa ua lē au i luga, tauaso loa le silasila i le tapuaiga a Samoa”.

E ui i mataupu sa vesia ai le lotoifale o le pulega o le Manu Samoa ona o lagona faaalia o se tasi o tama o le ‘au le alii o Eliota Fuimaono Sapolu, peitai sa lilifa le lagona lagolagoina e tagata o manatu faaalia o lea tama taalo, ona o se avanoa ua tuusa‘o atu ai i fofoga o le pulega o le lakapi a le lalolagi le IRB, ni lagona lē fiafia o le tapuaiga.

Ae e ui ina vesia lea mataupu ae o le faato‘ā foi mai o nisi o le tama o le aulakapi ae ua vaiaso talu ona mae‘a le taaloga mulimuli na malolo ai i Pool Games, na sili ona ilitatai ai lagona o le tapuaiga.

E lei maua se avanoa i le taitaimalaga le afioga Tuala Mathew Vaea mo sona finagalo, peitai o luga o le leitio o le 2AP na faaalia ai e le taitaifono o le iuni le afioga i le Palemia, Tuilaepa Lupesoliai Sailele Malielegaoi, sa feiloai ma le pulega o le ‘au ma o le tasi lea o mataupu sa ia fesiligia. O le tala atu a le pulega sa iai le fuafuaga e toe foi mai peitai o nisi o le ‘au e tatau ona foi ia latou konekarate.

O le kapeteni o le Manu Samoa le alii o Mahonri Schwalger, sa ia faaleo le lagona lē fiafia o tama o le aulakapi i le leai o se faamatalaga i le foi mai i Samoa, e ui sa ia faaalia o le tala atu a le taitaimalaga a o loma le taaloga ma Aferika i Saute, e foi i Samoa pe a au i quarterfinals, ae a leai, ua toe foi ia latou konekarate.

O le finagalo o le taitaifono i luga o le leitio a le Malo, na ia faaalia ai o mea ua tutupu ma aliali mai i le Ipu o le lalolagi i Niu Sila, o le a tele ni mea lelei o le a fanau mai ai i le lumanai aemaise le isi Ipu o le lalolagi.

Comments

comments