E manino le vaai mamao atu i le faaiuga o le faigapalota tele a le atunuu i le aso 4 o le masina fou o Mati e toe mamao le manumalo o le HRPP. E faavae lea lagona i le tulaga ua taatia mai ai le aofaiga o sui ua lesitala atu e avea ma sui tauva o le palota, lea e 83 o le a tauaveina le fu‘a a le HRPP, ae 63 sui tutoatasi lea e mautinoa o le to‘a 40 o ia sui tutoatasi e lagolago i le vaega faaupufai e puipuia aiātatau a tagata.
O le vaega faaupufai o le Tautua Samoa e na o le 25 sui tauva i lalo o lana tagavai. E iai ana sui tutoatasi peitai ua faailoa mai e le failautusi o le vaega faaupufai e lē oo i se toasefulu.
O isi sui tauva tutoatasi o loo faamaopoopo e se mafutaga o sui tauva tutoatasi lea ua mautinoa o loo aofia ai le tofa Levaopolo Talatonu o le a tauva mo le itumalo o Salega i Sasa‘e i lona suafa Olo Fiti Afoa Vaai.
O le mafutaga foi lea o loo iai ma le afioga Leota Su‘atele ma nisi o tamalii e pei o se loia le susuga Taulealeausumai Auimalaga Tiotio o le a tauva mai i le itumalo o Gagaifomauga Numera 2.
O sui tauva tamaitai ua faaulu e to‘a 24 ma o se faigapalota tele muamua lenei a le atunuu ua maoa‘e faapea se numera o sui tauva tamaitai o le a tausinio ai.
O le aofaiga atoa o sui tauva ua faaulu e 172 peitai o le toatasi o le sui tauva o Satupaitea ua na o le afioga Lautafi Fio Selafi Purcell, ua toe filifilia ai lea sui ae totoe ai le 171 o le a faia i ai le palota mo ni sui faipule o itumalo faaalalafaga e 48.
O le tapunia o le lesitala mo ni sui tauva ua taatia mai ai aso e tolu na amata faitau mai i le Aso Faraile ua mavae na tapunia ai le lesitala, e ave ai i le faamasinoga ni mataupu e fesiligia ai le agavaa o sui tauva.
Ua maua i ni molimau e iai le mataupu o le a faato‘ai faasaga i le tulaga agavaa o le sui tauva ua faaulu mo le itumalo o Lepa le tofa Tuula Kiliri Lafi Tuitui, o le a tauva ma le alii Palemia le susuga Tuilaepa Sailele Malielegaoi, lea ua lesitala nei o se sui tauva i se tasi o ona suafa matai o le Auelua Fatialofa Lupesoliai Tuilaepa Sailele Malielegaoi.
O le tulaga i le faia o le monotaga o le autu lea o le talosaga o le a faato‘ai e nisi o matai o le itumalo e pei ona faailoa mai e se molimau. O le tasi lea o itumalo sa tasi le finagalo e leai se palota ae toe filifilia lo latou faipule, peitai o lea ua iai le sui tauva ua faaulu.
O le a iloa se isi tulaga o le itumalo o le alii Palemia pe faaauau pea ona faia le palota, pe o le a tumau pea le finagalo autasi o le itumalo pe afai e aumai se finagalo o le faamasinoga i le fesiligia o le tulaga agavaa o le tofa Tuula i le iai ma le leai o sana monotaga i totonu o le latou nuu o Saleapaga.
O le itumalo o Lotofaga o loo iai molimau e ono fesiligia le tulaga agavaa o le sui tauva ua faaulu lona suafa o le susuga Fiaola Iosua Lole. O le isi foi itumalo e ono iai se talosaga faapea e oo i le faamasinoga o le itumalo o Palauli le Falefa ona e iai se sui tauva o loo fesiligia le faia o sana monotaga.
