O le Aso Faraile o le vaiaso ua tuanai atu na malaga asiasi ai le purinisese o le malo o Toga purinisese Salote Maumautaimi Tukua’ho i le aai o Melepone, o se tasi o vaega taua o le malaga faapitoa a lana afioga o le maimoaina lea o le museum a Melepone, aemaise lava o le vaega tonu lea ua faapitoa mo atumotu o le Pasefika le First people and Te Vainui o Pasifika.
O le afa o le sefulu i le taeao na amataina ai le asiasiga mamalu i le sauniga a tagatanuu muamua o le eleele o Ausetalia poo tagata Apoliki i la latou tu ma agaifanua e faafeiloai aloaia ai a latou malo faaaloalogia, o sauniga nei e masani ona susunuina se’i tulou lau o laau faapitoa ma taua i o latou tagata, ona faaaoga lea o le asuasu o le afi lenei e faapaiaina ai a latou malo faaaloalogia pe faamama ai ina ne’i o latou aumaia ni faamai ma ni agaga leaga i totonu o le lauelele nei, na taitaia le sauniga e nisi o sui aloaia o tagatanuu o le elele ma amata ai loa le asiasiga, na maitauina le faatauaina e nai o tatou uso mai Toga o lenei avanoa, pei ona faalauiloa ai a latou measina i le vaega lenei ua faapitoa mo atumotu o le Pasefika, o loo faalauiloa ai foi ma nisi o a tatou measina faatasi ma atumotu e tele o le Vasa Pasefika.
Na mae’a le asiasiga mamalu ona sosoo lea male taumafataga mama, na maua ai avanoa e feiloai atu ai sui o atumotu o le Pasefika faatasi ma Samoa i lana afioga i le purinisese ma faatino foi saunoaga faapitoa ma le agaga o le faafetai, aemaise o le tauaaoina o meaalofa mai sui o tagata Apoliki mo le purinisese, aemaise foi o lana faaaloaloga mai Toga mo tagata Apoliki.
Matagofie ma felanulanuai vaaiga eseese faa Pasefika e mitamita ai le fatu ma le agaga aua o lo tatou lea tofi.
