O se miti ua taunuu se tasi o valaaulia lē aumaua mo le tamaitai pule Priscilla Ale o le ausiva iloga a E’vana i Sini nei lea ua valaaulia mai Lonetona mo se faafiafiaga ia Novema 2016.
O lenei ausiva e faamautu lava i Sini ma o le Tutoatasi 2012 i Sini na ofo ai e faafiafia fua e aunoa ma se totogi i le Independence Ball na faia i le SKYVIEW.
Saunoa Priscilla Ale o lenei avanoa na silafia ai latou i luga o le Instagram e le ofisa o le Faaliga London Pacific Fashion Collective 2016 i le aso 15-17 Setema 2016. Ua na o lenei alo o Samoa ua filifilia nei, lea ua sauni atu e fai ma sui o mamanu ma ituaiga laei (gowns) Samoa ma le Pasefika e silasila ai le lalolagi atoa.
E lē gata o se tamaitai faiaoga siva e lautele lona tomai ma le taleni e aotauina ai vasega siva Polenisia ma Samoa mai talavou agai atu i le aupito laiti, ae o lenei valaaulia ua iloa ai le isi ana taleni o le su‘isu‘i lea e saunia lava e ia togiga eseese ma felanulanuai a le E’vana.
O le tulaga foi lea e taatele ai le moomia o la latou ausiva i valaaulia mo sailiga seleni, aso fanau, faaipoipoga ma taaloga faavaomalo i Sini ma Ausetalia.
O le tausaga talu ai ma le vaiaso talu ai na faafiafia ai foi i faaaliga o laei eseese a o lei faia le Taaloga a Samoa ma Toga i Parramatta a o molimauina e le to‘a 15,225 ma le isi miliona i luga o le televise.
Sa faafiafia foi i luga o le televise i le ālaata iva mo le polokalame o le Footy Show. I se tasi o autu o lenei malaga atu a Priscilla Ale mo Lonetona ia Setema, afai e lavea i le tolu pito i luga o le toatele o sui tauva o le a filifilia e Disney le kamupani ata tifaga le toatolu pito i luga e faailoa a latou taleni ia Novema 2016 i le faaaliga o le ata tifaga “Moana” lea e autu ia Seiuli Dwayne ‘Rock’ Johnson i le taimi e taunuu ai lenei tifaga i Lonetona.
O Priscilla Ale o le alo o Kalameli Fatialofa Mauga o Lepa ma Saleimoa faapea le tina ia Malisa Mauga mai Safata ma Vaitoloa.
