“Auā ua ia te i matou lenei oa i ipu omea, ina ia ile Atua le matua tele o lona mana, ae lē mai ia te’i matou. Ua puapuagatia i matou i mea uma, ae lē faaatuatuvaleina, ua fememeai, ae lē matuā fememeai. Ua sauaina ae le tuulafoaiina, ua lafotuina i lalo ae lē fano. Oloo tauave ile tino e le aunoa le fasiotia ole Alii o Iesu, ina ia faaalia le soifua o Iesu i o matou tino augavale.” (2 Korinito 4:7-10) O nisi ia o mau maumaututu mai le afioga ale Atua oloo tusia i luga ole polokalame ole sauniga faaleaiga aemaise ole toe sauniga mulimuli ole susuga ia Mailo Benjamin David Vai, ua fai lea ma taiala ma fesoasoani, oloo fai foi ma faamafanafanaga ile paia o aiga na lua, uo ma ē masani ona ole motusia faafuasei ole mafutaga ile tino nei ona ole malaga ale maliu ma le oti.
E! le oti e, o fea ea lou tui, le tuugamau e, o fea ea lou manumalo. A’o se auauna lelei sa galue faamaoni ma tautua faamaoni i totonu o aiga, nuu ma ekalesia aemaise ole malo, ina e ulufale maia ile fiafia o lou Alii.
Ua molimau uiga lelei ma uiga tausaafia ole susuga ia Mailo Benjamin David Vai, i ona aiga aemaise o ana uo ma ē masani, a’o soifua mai lea auauna, ua fesootai foi lagona o uso a pepese ile taleni ole musika ma talatalanoa ile misia o lea uso ma lana taleni pe a oo ina galulue faatasi tama ile musika.
Ole molimau ola lea o ana galuega lelei, ina ua vaaia le tumutumu o aiga, o uo ma ē masani faapea uso pepese o Mailo ile afiafi ole Aso Gafua i lona sauniga faaleaiga lea sa faia ile malumalu ole ekalesia Aso Fitu i Magele.
Na maualuga ma mamalu lea sauniga ona sa mafai ona faatasi atu iai le tele o susuga i faafeagaiga ma o latou faletua ae faapea foi i sui ole malo e pei ona auai atu iai le Konesula ole malo o Samoa ia Faolotoi Reupena Pogi faapea le afioga ia Fonoti Dr Lafitai Fuatai.
Ole susuga ia Mailo Benjamin David Vai na maliu ona ose gasegase sa maua ai mai le tausaga e 2017.
E valaau mai lona matai ua 45 tausaga o lona soifua ae oloo faatasi ma si ona faletua ia Faletui Laneselota. E toafitu alo o Mailo Ben Vai; o Faraimo, Moana, Aamira, Grace, Fiapaipai, Isaiah ma Harmony.
O mātua o Mailo Ben Vai, ole susuga ile faafeagaiga ia Rev Peniamina Vilita’i Vai ile afioaga o Vaiala, ma lona tina ia Rosarina Jioje Vai o Rotuma ma Fiti. E toafā i latou e aofia ai ma lona uso ma ona tuafāfine e toalua.
Na soifua mai lea auauna i Samoa ile aso 20 o Iulai 1972 ae na faamanavaina ele Atua ana galuega ile aso 12 o Fepuari 2018. Ole tele o lona taimi na nofo ai i Samoa, Tutuila, Jamaica, Fiji, Hawaii ma Niu Sila.
O lona olaga a’oa’oina sa iai lea ile aoga amata i Tutuila, faasolo ane ai i Marist Brothers i Samoa, Munro College i Jamaica, Clarendon College i Jamaica ma Mico Teachers’ College i Jamaica.
Ose tama na soifua mai ise aiga Kerisiano, auā o ona tuaa sa galulue lea ile Kolisi faafaifeau i Malua e sauniuni ai ile laua galuega faafaifeau. Na amata ona a’oa’oina lana taleni musika ma le pese faatasi ma lona tuafafine i mea e alu lona tamā e lauga ai, faapea foi taimi o faataitaiga o polokalame ole Lotu Tamaiti.
O lona siufofoga e ese mai ai foi ia mai isi tagata pepese ile sikailiina o lona leo ile taimi na amata mai ai ona sau pese siva reggae a’o iai i Jamica ile 12 tausaga. Ose tagata e fiafia e pese, auā soo se mea lava e alu iai e fiafia ai lava tagata e faalogologo i lona siufofoga. Sa alu i Samoa, Fiti ma Hawaii i lana taleni lava lenei ole musika.
I lona nofo ai i Niu Sila sa ofoina ai lona soifua mo le Alii e tautua ai le lotu ole ekalesia Aso Fitu, e ala i lona tofi failauga (tiakono), faatasi ai ma lona toalua ia Faletui ma lana fanau ia Aamira, Fiapaipai, Isaiah ma Harmony, ua galulue faatasi ma savavali ile malamalama o Keriso. Ose aiga ua faavaeina ile papa mautu o Iesu Keriso.
O lona toe sauniga e faia ile Aso Lua 20 o Fepuari ile malumalu lava ole ekalesia Aso Fitu i Magele ona molimoli atu ai lea o lona sa ile fanuatanu i Manukau e lagomau ai.
Ia faamaise ma faamafanafana le Agaga ole Atua i loto ole aiga faavauvau, ia tafiesea le ao pogisa ona ole motusia ole mafutaga ma le tamā ia Mailo Benjamin David Vai.
