E lē fesiligia le manaomia tele o le iai o se faapotopotoga a Ekalesia Kerisiano Samoa uma i Niu Sila. O le tulaga manaomia lea e fesoasoani ai Ekalesia Kerisiano uma a Samoa i Niu Sila, i taumafaiga a isi Ekalesia Kerisiano mo le galuega o le Talalelei o le Malo o le Atua i Niu Sila.
O le susuga i le faafeagaiga ia Danny Ioka, o ia lea o loo tausia le ekakesia o le Aomamala i Aotearoa Christian Church i Howick, ma o loo ia taumafai nei e faamaopoopo le faatūina o se faapotopotoga a Ekalesia Kerisiano Samoa i Niu Sila, auā le faamalieina o lea manaoga tāua o lenei foi vaega o le ekalesia, o le iai o se faapotopotoga Kerisiano Samoa i lenei atunuu.
O le tulaga lea e fesoasoani ai Ekalesia Kerisiano uma a Samoa i Niu Sila i taumafaiga a isi aulotu kerisiano mo le galuega o le Talalelei o le Malo o le Atua i Aotearoa, ae lē gata i lea o le Mau tauave a Samoa o ona po nei “E faavae Samoa i le Atua.” O soo se mea lava o le lalolagi e agai iai tagata Samoa e faavae lava mea uma latou te faia i le finagalo Paia o le Matai i le Lagi.
Ua leva ona faavaatu‘ia taumafaiga a Ekalesia Kerisiano i Niu Sila, ona o feteenaiga ogaoga i mataupu silisili o le faatuatuaga Kerisiano. Ua agai foi ina faavaalelea i matagi ona o tulaga o le galulue faatasi e mafuli lava ina faafoliga.
A gaogaosa le olaga o le tagata, o le a vaaia se tino patupatu solo, ona ua lē mamā lona toto, ma ua aafia foi ona alatoto. A salalautasi le mafaufau o le Ekalesia, ua salalau solo foi le tino o le galuega a le Atua.
O le faaaliga lea o le toasa, ae lē o le mana o le alofa laveai. A galulue faatasi Ekalesia Kerisiano a Samoa mo le Malo o le Atua, o le a manuia Niu Sila, faatasi ai ma Samoa uma ua nonofo i Niu Sila i nei auga tupulaga.
E lē tupu fua ma lē tupu tele foi le fiafia o tagata Samoa e atiae Ekalesia i soo se atunuu e aumau ai i nei auga tupulaga.
O faaaliga ia o le atamai faa-Samoa moni i le fauga o le olaga ma le lalolagi ina ua faagagaina e le Atua fetalai, ma faamalamalamaina e le Atua o le malamalama, ma faatamaoaigaina e le Atua o faamanuiaga.
E lautua ia mea uma i le tāua o le avea o Samoa ma nuu filifilia, e faimalaga ma le Atua o le ola i ana galuega foafoa ma ana galuega faaola i le lalolagi aoao. E lagona gofie foi e soo se Samoa malamalama le tāua o le iai o se faiga e maopoopo ai le Mau a Samoa mo le olaga lautele i Niu Sila.
O le mau a Samoa e galulue faatasi ai ana aganuu ua faatalaleleina, lana tapuaiga faa- Kerisiano ma lona Malo tutoatasi ua faavaeina i le Atua, auā o le faitauga manino lea o le gasologa mai o le talaaga o Samoa o ona po nei, talu le amataga o le senituri e sefuluiva.
E mafai ona faaupu faapea le faitauga lea – O le auaunaga a le aganuu a Samoa ma le Ekalesia Kerisiano mo le faatuina o le Malo o le Atua i Samoa, na fanau mai ai le Malo Tutoatasi o Samoa e faavae i le Atua.
O nisi ia o lagona o le susuga i le faafeagaiga ia Danny Ioka o loo taumafai ai e faatu se faalapotopotoga a Ekalesia Kerisiano Samoa i Niu Sila ona o le manumanu i le Mau a Samoa ne‘i oia, ona o le lē tutu faatasi ma galulue faatasi Ekalesia uma.
Saunoa le faafeagaiga, ua manumanu i le mau a Samoa nei oia ona o le lē tutu faatasi ma le lē galulue faatasi i Niu Sila. Afai e maota tauave Samoa, e toese-a-nuu-potopoto foi Samoa. O le tāua lea o le iai o se faapotopotoga a Ekalesia Kerisiano uma a Samoa i Niu Sila. Ua pa‘i tumutumu taumafaiga lelei e tele a tagata Samoa mo Samoa i Niu Sila, faatasi ai ma le olaga lautele.
Ua vaaia i faigamalo, i aoga, i le faaolaolaina o le gagana Samoa ma aganuu a Samoa, i taaloga, i le atiina a‘e o ekalesia ma pisinisi, ma le tele lava o isi vaega tāua o le olaga i Niu Sila. Ua tatau ona loa la ona ave le taualuga auā ua mautu le faavae.
Ua tatau ona malu le Faletele a Samoa i Niu Sila auā lana Tapuaiga, ma le faaolaolaina o lana mau tauave, aemaise o le leoina o lona malae ua faalautele e le Atua i atunuu uma e faimalaga ai ma le Atua Soifua. E lē ona o i tatou, ae ona o le finalago Paia o le Atua e ana i tatou.
Na talosia foi e Iesu Keriso le manaomia o le tasi-maopoopo o ona soo uma i le lalolagi e pei ona tasi o Ia ma le Tamā i le Agaga Paia.
