Na faatāuaina e le itumalo o Wyndham i le aai o Melepone, tu ma agaifanua a atumotu o le Polenisia i le vaiaso na tuanai atu nei.
Na aofia ai ni faafiafiaga e ala i siva ma pesepesega, mai nisi o faalapotopotoga mai atumotu o le Pasefika.
Na maua ai ma se avanoa i le Aso Tofi aso 13 e faafiafia ai le ausiva a le Polynation, o le aufaafiafia lenei na maua ma fau lo latou igoa mai atumotu eseese o le vasa Pasefika na soifua ma afifio mai ai, a o lei avea Melepone ma o latou nuu e pei ona saili malo ai nei.
O le Polynation o se aufaafiafia ua na o tamaitai lava, o nisi na soifua mai le malo o Toga, o nisi na malaga mai le atunuu o Tuvalu, ma nisi o tamaitai Samoa ua atili lalelei ai le ausiva ma felanulanuai ai teuga ma laei faa-Pasefika, ae lē gata i lea, o le faatinoina o taga ma sausaunoaga faa-Polenisia.
Na molimauina le toatele o le mamalu o tagata eseese na maimoaina le faamoemoe, o la latou tautinoga, e matagofie naua faafiafiaga faa-Polenisia i le silasila ma le maimoa, pe a faatinoina e ona ia lava tagatānuu moni.
Ua iai le faanaunautaiga o le Polynation e faalautele lo latou valaauina ma le taleni i le lautele o Melepone ma Vitoria atoa.
