O loo faagasolo le fonotaga tele a le Ekalesia Aso Fitu o le Toe Afio Mai a Kuiniselani i Saute mo le tasi le vaiaso atoa i le nofoaga autū Kallanger, e pei ona tatalaina i le po o le Aso Faraile, 16 o Setema. I sauniga o le Sapati sa vaevaeina vasega i vaega a le autalavou ma le aumatutua faapea alo ma fanau, ma e tofu lava le vasega ma le quest speaker sa laugaina se feau faamalosiau.
O le susuga ia Dr Barry Shanel sa taitaia le vasega a le aumatutua, o ia foi o le Minisita o le Foreign Affairs & Trade. O le Peresitene o le Koneferenisi a Kuiniselani i Saute e aofia ai ma Rockhaton ma nuu tuaoi, o le susuga ia Dr Neil Watts.
E ova i le fitu afe i latou na faatasia i le Sapati, Aso Toonai, 17 o Setema i taimi o sauniga ae o aso o le vaiaso e tusa ma le tolu afe limaselau ona sa feagai ma galuega. E sefulu Ekalesia Samoa i totonu o Brisbane, e lē aofia ai isi aai o Kuiniselani.
O le taitai o Kuiniselani i le itu Samoa o le susuga ia Pr Ieti ma le faletua ia Alofa Ah Siu e tasi lana Ekalesia o tausi, susuga ia Pr Samuelu ma le faletua ia Emma Afamasaga (3 Ekalesia), Aitui ma le faletua ia Jacinta Fanene (2 Ekalesia), Tusitina ma le faletua ia Lata Faiumu (2 Ekalesia), ma le susuga ia Andrew ma le faletua ia Faga Feavea‘i o loo vaaia foi Ekalesia e lua.
E 5,500 Ekalesia Aso Fitu o le Toe afio mai e i totonu o le Division lea o loo faauluulu i le susuga ia Dr Barry Shanel, e aofia ai ma ekalesia i totonu o Samoa, a o Ekalesia i totonu o Kuiniselani i Saute e 95 aulotu. O le tausaga fou 2012 o le a faamanatu ai le 50 tausaga talu ona amata fai nei Koneferenisi i tausaga taitasi. Na molimauina le siomia o le fanua a le Ekalesia i le anoanoai o faleie o aiga ma Ekalesia taitasi a le Ekalesia i le toatele o le auusufono.
O le a faamae‘aina lea Koneferenisi i le faaiuga o le vaiaso a sau nei.
